प्रि ओपन सेसन : करिब ३५ अंकले बढयो नेप्से

काठमाडौँ । नेपाल स्टक एक्सचेञ्ज (नेप्से) बुधबारको प्रि-ओपन सेसनमा करिब ३५ अंकले उकालो लाग्दै समग्र बजारमा सकारात्मक संकेत देखिएको छ। बजार सूचक ३४.७९ अंकले बढेर २७१२.२५ बिन्दुमा पुगेको हो।

यस सेसनमा सेन्सेटिभ इन्डेक्स पनि ६.७१ अंकले वृद्धि भएको छ, जसले ठूला र प्रभावशाली कम्पनीहरूको सेयर मूल्यमा समेत सकारात्मक परिवर्तन आएको संकेत गर्छ।

प्रि-ओपन सेसन अवधिमा १५८ कम्पनीका १ लाख १८ हजार ४५ कित्ता शेयर किनबेच भएका छन्। उक्त कारोबारबाट ४ करोड ६९ लाख ३२ हजार ३८८ रुपैयाँ २० पैसा बराबरको आर्थिक कारोबार भएको नेप्सेले जानकारी दिएको छ।

बजार विश्लेषण गर्दा, १४९ कम्पनीको शेयर मूल्यमा वृद्धि भएको छ भने ५ कम्पनीको मूल्य घटेको छ। ४ कम्पनीको मूल्यमा भने कुनै परिवर्तन देखिएको छैन।

बुधबारको प्रारम्भिक कारोबारमा देखिएको उत्साहजनक सुधारले लगानीकर्तामा सकारात्मक मनोवृत्ति कायम राख्ने अपेक्षा गरिएको छ। बजारले आगामी दिनमा पनि यस्तै स्थायित्व देखाउने हो भने दीर्घकालीन लगानीकर्ताका लागि अवसर थप सशक्त बन्ने छ।