धितोपत्र बोर्डद्वारा निर्देशिका संशोधन, अब वैदेशिक रोजगारीको आईपीओ ४ दिन मात्र खुल्ने

काठमाडौं । नेपाल धितोपत्र बोर्डले धितोपत्र निष्काशन तथा बाँडफाँड निर्देशिकामा नवौं संशोधन गरेको छ। संशोधित निर्देशिका आगामी साउन १ गतेदेखि लागू हुने बोर्डले जानकारी दिएको छ।

संशोधनअनुसार अब वैदेशिक रोजगारीमा रहेका नेपालीहरूका लागि छुट्याइएको आईपीओमा आवेदन दिन चार कार्य दिन मात्र खुला रहनेछ। यसअघि यस्तो प्राथमिक शेयर निष्काशनका लागि १५ दिनको आवेदन अवधि हुने प्रावधान थियो।

बोर्डका अनुसार, अघिल्ला निष्काशनहरूमा केही दिनमै अत्यधिक आवेदन पर्ने गरेको र बाँकी दिनहरू निष्क्रिय जस्तै हुने गरेकोले लगानीकर्ताको मागअनुसार आवेदन दिने समय छोट्याइएको हो। यसबाट प्रक्रिया छरितो र प्रभावकारी हुने बोर्डको अपेक्षा छ।

यद्यपि, यदि चार दिनको अवधिमा सम्पूर्ण धितोपत्र बिक्री नभएमा अवधि पुनः १५ दिनसम्म विस्तार गर्न सकिने व्यवस्था पनि संशोधित निर्देशिकामा उल्लेख गरिएको छ।

बोर्डले धितोपत्र निष्काशन प्रक्रियालाई प्रविधिमैत्री, पारदर्शी र सहज बनाउन समयानुकूल संशोधन गर्दै आएको छ। यो निर्णयले विशेष गरी विदेशमा रहेका नेपालीहरूलाई लक्षित आईपीओ निष्काशनमा थप स्पष्टता ल्याउने अपेक्षा गरिएको छ