‘आ बाट आमा’ को चितवनबाट सुरु गरियो छायांकन

काठमाडाैं । आर्या इन्टरटेन्मेन्टको ब्यानरमा निर्माण हुने नयाँ नेपाली फिल्म ‘आ बाट आमा’ को भव्य शुभ मुहूर्त तनहुँस्थित प्रसिद्ध गलेश्वर मन्दिरमा गरिएको छ। बिहीबार आयोजित मुहूर्त कार्यक्रममा करिब २ सय जना बटुकहरूले हवन र पूजा–आर्चना गरी विधिवत् रूपमा फिल्मको सुरुआत गरेका हुन्।

मुहूर्त कार्यक्रममा अभिनेता प्रदीप रावत, गजित बिष्ट, सिम्रन पन्त, निर्देशक माओत्से गुरुङलगायत फिल्म क्षेत्रका चर्चित कलाकार तथा निर्माता-निर्देशकहरूको उपस्थिति थियो।

निर्माण पक्षका अनुसार, फिल्मको छायांकन साउन १५ गते (हिजो) देखि चितवनबाट सुरु भइसकेको छ। निर्देशक चन्द्र पन्तका अनुसार फिल्मको छायांकन कार्य करिब एक महिनासम्म चल्नेछ। छायांकन चितवनपछि काठमाडौं र भारतको हैदरावादसम्म जारी रहने बताइएको छ।

फिल्ममा अभिनेता पल शाहसँगै दक्षिण भारतीय चर्चित कलाकार प्रदीप रावत, सिम्रन पन्त, विपना थापा, उषा उप्रेतीलगायत कलाकारहरूले मुख्य भूमिका निर्वाह गर्नेछन्। फिल्मले आमा र सन्तानबीचको प्रेम, त्याग र सम्बन्धको भावनात्मक कथा बोकेको निर्माण पक्षको भनाइ छ।

‘आ बाट आमा’ का निर्माता कृष्णप्रसाद सुवेदी, ध्रुव न्यौपाने र प्रकाशजंग कुँवर रहेका छन्। कार्यकारी निर्माता करण सिंह हुन् भने छायांकन निर्देशन नवराज उप्रेतीले सम्हाल्ने छन्।

फिल्म २०७९ फागुन १५ गते देशभर प्रदर्शनमा आउने निर्माण टिमले जानकारी दिएको छ। यस्तै, फिल्मको विदेश प्रदर्शन अधिकार अष्ट्रेलिया र न्यूजिल्यान्डमा बिक्री भइसकेको छ। ती देशका लागि वितरण अधिकार हिमारु इन्टरटेन्मेन्टले खरिद गरेको हो भने नेपालमा आरआर फिल्म्सले वितरणको जिम्मेवारी लिएको छ।