झापा इनर्जीले भदौ २० गतेदेखि सर्वसाधारणका लागि आईपीओ ल्याउने

काठमाडौँ । झापा इनर्जी लिमिटेडले दोस्रो चरणअन्तर्गत सर्वसाधारण लगानीकर्तालाई लक्षित गर्दै आगामी भदौ २० गतेदेखि प्रारम्भिक सार्वजनिक निष्काशन (आईपीओ) खुला गर्ने भएको छ। कम्पनीले यसअघि आयोजना प्रभावित स्थानीय बासिन्दा र वैदेशिक रोजगारीमा रहेका नेपालीलाई लक्षित आईपीओ निष्काशन गरी बाँडफाँट गरिसकेको छ।

नेपाल धितोपत्र बोर्डबाट स्वीकृति प्राप्त अनुसार कम्पनीले प्रतिकित्ता १०० रुपैयाँ अंकित मूल्यमा ९ लाख ५० हजार ४७५ कित्ता साधारण शेयर निष्काशन गर्न अनुमति पाएको हो।

पहिलो चरणमा ३ लाख ८० हजार १९० कित्ता शेयर आयोजना प्रभावितलाई र ५७ हजार २९ कित्ता शेयर वैदेशिक रोजगारीमा रहेका नेपालीहरुलाई निष्काशन गरिएको थियो।

समग्र निष्काशनमा २८ हजार ५१४ कित्ता शेयर सामूहिक लगानी कोषका लागि र ११ हजार ४०६ कित्ता शेयर कम्पनीका कर्मचारीका लागि सुरक्षित गरिएको छ। बाँकी ४ लाख ७३ हजार ३३६ कित्ता साधारण शेयर अब सर्वसाधारण लगानीकर्ताले आवेदन दिन पाउनेछन्।

आईपीओमा कम्तीमा १० कित्ता र बढीमा ५ हजार कित्तासम्म माग गर्न सकिने व्यवस्था गरिएको छ। निष्काशन अवधि भदौ २४ गतेसम्म रहनेछ।

यस आईपीओको निष्काशन तथा बिक्री प्रबन्धकको जिम्मेवारी हिमालयन क्यापिटल लिमिटेडले लिएको छ।