वाणिज्य बैंकका अध्यक्षहरुसँग छलफल गर्दै गभर्नर, यस्तो छ एजेन्डा

काठमाडौं । नेपाल राष्ट्र बैंकका गभर्नर डा. विश्वनाथ पौडेलले देशको वित्तीय प्रणाली सुदृढ बनाउने उद्देश्यले वाणिज्य बैंकका अध्यक्षहरूसँग आज विशेष छलफल गर्दै छन्। राजधानीको सोल्टी होटलमा आयोजना हुने यो बैठक बैंक तथा वित्तीय क्षेत्रको दीर्घकालीन सुधार र विकास योजनासँग जोडिएको छ।

हिजो मात्रै वाणिज्य बैंकका प्रमुख कार्यकारी अधिकृतहरूसँग समसामयिक मुद्दामा विमर्श गरेका गभर्नर पौडेल आज सञ्चालक समितिका अध्यक्षहरूसँग पुनः गहन संवादमा जुट्न लागेका हुन्।

छलफलको केन्द्रमा तीन मुख्य एजेन्डा छन् — हालै सार्वजनिक मौद्रिक नीतिको प्रभावकारिता, दोस्रो वित्तीय क्षेत्र विकास रणनीति, र संसदमा छलफलरत बैंक तथा वित्तीय संस्था सम्बन्धी ऐन (बाफिया) संशोधन।

विशेषगरी बाफिया विधेयकमा प्रस्तावित बैंकर र व्यवसायीको भूमिकालाई स्पष्ट पार्ने, उल्लेख्य स्वामित्वको सीमा २ प्रतिशतबाट घटाएर १ प्रतिशत बनाउने, तथा व्यवसायिक ऋणमा लगाइएको नयाँ प्रस्तावबारे समेत विस्तृत छलफल हुने बताइएको छ।

मंगलबारको छलफलमा बैंकहरूले लगानीकर्तालाई व्यवसायिक रूपमा बाहिरिने स्पष्ट ‘एक्जिट पोलिसी’ सुनिश्चित गर्नुपर्ने सुझाव दिएका थिए। गभर्नर पौडेलले पनि आफू र अर्थमन्त्री उपयुक्त समय र नीतिको पक्षमा रहेको उल्लेख गरेका छन्।

वित्तीय अनुशासन, पारदर्शिता र सन्तुलित सुधारतर्फ बैंक तथा नियामक निकायहरूको सहकार्य बढ्दै गएको संकेत दिने आजको छलफलबाट अर्थतन्त्रमा स्थायित्व र विश्वासको सन्देश जाने अपेक्षा गरिएको छ।