नेपाल एयरलाइन्सका कर्मचारी ५४ लाख ७१ हजार मुद्रासहित पक्राउ

काठमाडौं । त्रिभुवन अन्तर्राष्ट्रिय विमानस्थलबाट नेपाल एयरलाइन्सका एक कर्मचारी ५४ लाख ७१ हजार रुपैयाँभन्दा बढी विदेशी तथा नेपाली मुद्रासहित पक्राउ परेका छन्।

नेपाल एयरलाइन्समा ग्राउन्ड इक्विपमेन्ट अपरेटर (जिइओ) का रूपमा कार्यरत ५० वर्षीय कमल नारायण विश्वास पक्राउ परेका हुन्। सुनसरीको गढी गाउँपालिका–१ स्थायी घर भएका विश्वास हाल काठमाडौंमा बसोबास गर्दै आएका छन्।

प्रहरीका अनुसार उनी मलेसियाको क्वालालम्पुर जानका लागि बाटिक एयरको उडान नम्बर ओडी–१८१ मार्फत प्रस्थान गर्ने क्रममा सुरक्षा जाँचमा परेका थिए। शरीर तथा सामानको खानतलासी गर्दा उनले लगाएको कालो रंगको लोन्जनभित्र विभिन्न देशका मुद्रा लुकाइराखेको अवस्थामा फेला परेको थियो।

बरामद मुद्राको कुल नेपाली मूल्य ५४ लाख ७१ हजार ६८९ रुपैयाँ ३२ पैसा रहेको प्रहरीले जनाएको छ। बरामद रकममा अमेरिकी डलर, ओमानी रियाल, पाकिस्तानी रुपैयाँ, मलेसियन रिङ्गिट, श्रीलंकाली रुपैयाँ, जापानी येन, पश्चिम अफ्रिकी फ्राङ्क तथा नेपाली रुपैयाँ समावेश छन्।

अनुसन्धानका क्रममा विगतमा पनि उनले विभिन्न समयमा १६ पटकसम्म विदेशी मुद्रा बोकेर यात्रा गरेको विवरण फेला परेको प्रहरीको दाबी छ।