काठमाडौँ । पोखराबाट फर्किएका पूर्वराजा ज्ञानेन्द्र शाहलाई काठमाडौँमा भव्य स्वागत गरिएको छ। आइतबार त्रिभुवन अन्तर्राष्ट्रिय विमानस्थलमा उनका समर्थकहरूले ठूलो संख्यामा उपस्थित भएर उनलाई स्वागत गरेका हुन्।
पूर्वराजाको स्वागतका लागि राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन, वरिष्ठ नेता पशुपति शमशेर जबरा, राप्रपा नेपालका अध्यक्ष कमल थापा, व्यवसायी दुर्गा प्रसाईं लगायतका विशिष्ट व्यक्तिहरू विमानस्थल पुगेका थिए।
राजसंस्था पुनःस्थापनाको माग गर्दै आएका उनका समर्थकहरूले झन्डा, ब्यानर र नारासहित उत्साहित रूपमा पूर्वराजालाई स्वागत गरेका थिए। उनीहरूले राजसंस्थाको पक्षमा नारा लगाउँदै विमानस्थल क्षेत्रलाई राजतन्त्र समर्थकहरूको सभाजस्तो बनाएका थिए।
पूर्वराजा शाहले समर्थकहरूलाई हात हल्लाउँदै अभिवादन गरेका थिए। उनका समर्थकहरू राजसंस्था पुनःस्थापनाका लागि निरन्तर संघर्ष गर्ने प्रतिबद्धता व्यक्त गर्दै विमानस्थल क्षेत्रमा लामो समयसम्म उपस्थित रहे।
यसरी हाल नेपालमा राजसंस्थाप्रति जनसमर्थन रहेको देखाउने यो दृश्यले पुनः एक पटक राजसंस्था पुनःस्थापनाको बहसलाई बल प्रदान गर्ने देखिन्छ।
नेपालमा संघीय लोकतान्त्रिक गणतन्त्र घोषणा भएको १६ वर्षपछि पूर्वराजा ज्ञानेन्द्र शाह फेरि सक्रिय बन्दै गएका छन्। हालैका दिनमा उनले विभिन्न जिल्लाहरूमा भ्रमण, मठमन्दिर दर्शन, नागरिकहरूसँग भेटघाट, सेल्फी खिच्ने, र पोखरामा आफ्ना दाजु स्वर्गीय राजा वीरेन्द्र शाहको सालिक अनावरण गर्ने जस्ता गतिविधिहरू गरिरहेका छन्।
पूर्वराजाको सक्रियतासँगै राजसंस्थाप्रति जनसमर्थन बढ्दै गएको चर्चा भइरहेको छ। पोखरामा आयोजित कार्यक्रममा पुरानो राष्ट्रिय गान ‘श्रीमान् गम्भीर नेपाली…’ बजाइएको दृश्यले राजसंस्था समर्थकहरूलाई थप हौसाएको देखिन्छ।
पूर्वराजाले गत फागुन ७ गते, प्रजातन्त्र दिवसको पूर्वसन्ध्यामा जारी गरेको भिडियो सन्देशमा आफूले "जनताको नासो जनतालाई सुम्पिएको" तर जनताको हितका लागि उक्त नासो पुनः फिर्ता लिने समय आएको संकेत गरेका थिए। यस अभिव्यक्तिपछि राष्ट्रिय प्रजातन्त्र पार्टी (राप्रपा) लगायतका राजसंस्था पक्षधर संगठनहरूले खुलेर राजसंस्था पुनःस्थापनाको अभियानलाई तीव्रता दिएका छन्।
शनिवार मात्रै वीरगञ्जमा राजसंस्थाको पक्षमा भव्य मोटरसाइकल ¥याली आयोजना गरिएको थियो भने यसअघि बुटवलमा राजावादीहरूको ठूलो सभा सम्पन्न भएको थियो।
सत्ता पक्ष चिन्तित, दलहरूमा हलचल
पूर्वराजाको सक्रियतासँगै सत्ता पक्ष र गणतन्त्र समर्थक दलहरू सचेत बनेका छन्। नेकपा (माओवादी केन्द्र) ले आफ्नो तराई केन्द्रित राजनीतिक अभियान स्थगित गरी शीर्ष नेताहरूलाई काठमाडौँमा केन्द्रित गरेको छ। नेपाली कांग्रेस र नेकपा (एमाले) भित्र पनि राजाको बढ्दो सक्रियताबारे छलफल सुरु भएको बताइन्छ।
सरकारको कार्यसम्पादनप्रति आम नागरिक असन्तुष्ट भइरहेका बेला पूर्वराजाको सक्रियताले जनमानसमा नयाँ बहस जन्माएको छ। झण्डै दुई-तिहाइ बहुमत रहेको वर्तमान सरकारले जनअपेक्षा अनुसार काम गर्न नसकेको आलोचना भइरहेका बेला राजसंस्थाको बहस पुनः चर्किएको छ।
कतिपय विश्लेषकहरूले राजाको गतिविधिले व्यवस्था संकटमा पर्ने त होइन भन्ने आशंका व्यक्त गरेका छन्। वर्तमान राजनीतिक अस्थिरता, भ्रष्टाचारको बढ्दो गुनासो, र जनतामा बढ्दो निराशाका बीच राजसंस्थाको मुद्दाले नयाँ राजनीतिक तरङ्ग सिर्जना गरेको देखिन्छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
