काठमाडौं । प्रसिद्ध युरोपेली चेन होटल ब्रान्ड लुभ्र होटल्स ग्रुप अन्तर्गतको लक्जरी ब्रान्ड ‘रोयल ट्युलिप’ ले नेपालमा भित्रिने भएको छ ।
क्लासिक भ्यु रिसोर्ट लिमिटेडले काठमाडौं बूढानीलकण्ठमा निर्माण गरिरहेको रिसोर्ट व्यवस्थापन सरोवर होटल्सले गर्ने भएको हो ।
दक्षिण एसियामा रोयल ट्युलिपको व्यवस्थापन सरोवर होटल्सले गर्ने गर्छ । यसले नेपाललाई विश्व लक्जरी बजारमा महत्त्वपूर्ण योगदान दिने कम्पनीले जनाएको छ ।
यो परियोजनाको नेतृत्व ग्लोबल इक्विटी फन्ड लिमिटेड अध्यक्ष मुकुन्दराज कुँवर र निर्देशक आशिष ढकालले गरेका छन् । रोयल ट्युलिपले नेपालमा नयाँ लक्जरी मापदण्ड स्थापना गर्ने दाबी कम्पनीको छ ।
बूढानीलकण्ठको शान्त वातावरणमा अवस्थित यो लक्जरी रिसोर्ट त्रिभुवन अन्तर्राष्ट्रिय विमानस्थलबाट ३० मिनेट यात्रामा पुगिने छ ।
२६ रोपनी क्षेत्रफलमा फैलिएको रिसोर्टमा ७५ कोठा रहने छन् । आधुनिक सुविधा र नेपालको प्राकृतिक सौन्दर्य एकीकृत गर्ने गरी कोठा डिजाइन गरिएको कम्पनीले जनाएको छ ।
यहाँ एकैपटक ५०० जनालाई सेवा दिने ब्यांक्वेट हल, विश्वस्तरीय स्पा, स्टिम रुम, निजी ज्याकुजी र अन्य वेलनेस सुविधा उपलब्ध हुनेछन् । स्वदेशी तथा विदेशी पाहुनाका लागि शान्त र अद्वितीय ‘होलिडे’ अनुभव दिलाउने विश्वास लगानीकर्ताको छ ।
सरोवर होटल्सका प्रबन्ध निर्देशक अजय बाकायाले नेपालको लक्जरी बजारमा रोयल ट्युलिप ब्रान्ड प्रवेशले उत्साह थप्ने बताए ।
‘नेपाल भारतीय र अन्तर्राष्ट्रिय पर्यटकका लागि आकर्षक गन्तव्य बन्दैछ, र हामी यस जीवन्त बजारमा सेवा विस्तार गर्न पाउँदा खुसी छौं,’ उनले भने ।
भारत, अफ्रिका, अष्ट्रेलिया, फ्रान्स, र बेलायतमा ४५ वर्षभन्दा बढीको अनुभव संगालेका बाकायाले सारोवर होटल्सको उल्लेखनीय वृद्धिमा महत्वपूर्ण योगदान पुर्याएका छन्।
यस होटलमा १ अर्ब ८० करोड लगानी हुने भएको छ । रोयल ट्युलिप सरोवर होटल्सको औपचारिक हस्ताक्षर कार्यक्रम मंगलबार नयाँदिल्लीमा गर्ने योजना छ ।
कम्पनी अध्यक्ष कुँवरले रोयल ट्युलिपलाई नेपाल ल्याउन पाउँदा गर्व महसुस भएको बताए । उनले यस रिसोर्टले देशमा लक्जरी आतिथ्यको नयाँ स्तर स्थापित गर्ने दाबी गरे ।
रोयल ट्युलिप बुढानिलकण्ठ रिसोर्टले नेपालको बढ्दो पर्यटन क्षेत्रलाई उल्लेखनीय रूपमा योगदान पुर्याउने अपेक्षा गरिएको छ । जसले मनोरञ्जन र व्यवसाय दुबै प्रकारका यात्रुहरूलाई आकर्षित गर्नेछ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
