काठमाडौं । राष्ट्रिय गौरवको आयोजना माथिल्लो तामाकोशीको खुद नोक्सानी घटेको छ । कम्पनीले मंगलबार सार्वजनिक गरेको गत आर्थिक वर्ष २०८०/८१ को चौथो त्रैमासको अपरिष्कृत वित्तीय विवरण अनुसार खुद नोक्सानी २ अर्ब ६८ करोड ६८ लाख रुपैयाँ रहेको छ ।
जबकी अघिल्लो वर्षको सोही अवधिमा कम्पनी ४ अर्ब ९ करोड ८२ रुपैयाँ नोक्सानीमा थियो । समीक्षा अवधिमा कम्पनीको विद्युत् बिक्री आम्दानी, संचालन नाफा बढ्दा र खर्च घट्दा नोक्सानी घटेको हो ।
समीक्षा अवधिमा कम्पनीको विद्युत् बिक्रीबाट हुने आम्दानी ७.९३ प्रतिशतले बढेर ८ अर्ब ७५ करोड रुपैयाँ पुगेको छ । यस्तै, संचालन नाफा २८.३३ प्रतिशतले बढेर ३ अर्ब ९७ करोड पुगेको छ ।
समीक्षा अवधिमा कम्पनीको वित्तीय खर्च ७.८६ प्रतिशतले घटेर ६ अर्ब ६९ करोडमा झरेको छ । यस अवधिमा कम्पनीले विद्युत् बिक्रीबाट पौने ९ अर्ब आम्दानी गरे पनि खर्च उच्च हुँदा घाटामा गएको हो ।
कम्पनीको दीर्घकालीन ऋण उच्च रहेकाले त्यसको ब्याज खर्च धेरै हुँदा नोक्सानीमा गएको हो । कम्पनीको दीर्घकालीन ऋण अझै ७१ अर्ब १३ करोड रुपैयाँभन्दा बढी छ । निर्माण अवधि लम्बिँदा लागत अस्वभाविक बढेको थियो । जसकारण अझै केही वर्ष नाफामा असर पर्ने कम्पनीले जनाएको छ ।
हाल २१ अर्ब १८ करोड रुपैयाँ चुक्ता पूँजी रहेको कम्पनीको जगेडा कोष ९ अर्ब १३ करोड रुपैयाँ ऋणात्मक छ ।
समीक्षा अवधिमा कम्पनीको प्रतिसेयर आम्दानी १२.६९ रुपैयाँ ऋणात्मक छ । गत वर्ष यही अवधिमा यस्तो आम्दानी ३८.७० रुपैयाँ ऋणात्मक थियो ।
कम्पनीको प्रतिसेयर नेटवर्थ ५६.८८ रुपैयाँ छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
