काठमाडौँ । नेपालको अटोमोबाइल व्यवसायीहरूको छाता संगठन नाडा अटोमोबाइल्स एसोसिएसन अफ नेपाल (नाडा) भित्रको विवाद सतहमा आएको छ। नाडामा सवारी आयातकर्ता, बिक्रेता, स्पेयर पार्ट्स आयातकर्ता तथा सर्भिस सेन्टर सञ्चालकहरू सदस्य रहँदै आएका थिए। तर, सवारीसाधन आयातकर्ताहरूले अब छुट्टै संस्था गठन गरेका छन्।
ठूला व्यवसायीहरूको पहलमा "नेपाल अटोमोबाइल्स इम्पोर्टर्स एण्ड म्यानुफ्याक्चर्स एसोसियशन" नामक संस्था फागुन ९ गते दर्ता भएको छ। हालसम्म औपचारिक घोषणा नगरिए पनि, यो संस्थामा केवल चार पाङ्ग्रे, दुई पाङ्ग्रे, र व्यवसायिक सवारीसाधन आयातकर्ता मात्र सदस्य बन्न पाउने व्यवस्था गरिएको छ। नाडामा अटो व्यवसायीहरूका सबै क्षेत्रलाई समेटिएको थियो, तर नयाँ संस्था विशिष्ट रूपमा सवारी आयातकर्ताहरूका लागि मात्र केन्द्रित रहनेछ।
नयाँ संस्थामा नेपालका प्रतिष्ठित अटोमोबाइल व्यवसायीहरू आबद्ध भएका छन्। टोयोटा गाडीको आधिकारिक बिक्रेता युनाइटेड ट्रेडर्स सिण्डिकेटकी निर्देशक रितु वैद्यलाई अध्यक्ष बनाउने तयारी छ, भने किया गाडीको आयातकर्ता कन्टिनेन्टल ट्रेडिङका अध्यक्ष सुहृद घिमिरे उपाध्यक्ष बन्नेछन्।
स्रोतका अनुसार, नयाँ संस्थामा नेपालका ठूला अटोमोबाइल व्यवसायी घराना आबद्ध भएका छन्। लक्ष्मी इन्टरकन्टिनेन्टल (हुन्डाई), एसपीजी अटोमोबाइल्स (ओमोडा & जेइ), पारामाउण्ट मोटर्स (एमजी), साइमेक्स इंक (बिवाईडी), स्याकार ट्रेडिङ (होण्डा), जिओ फोर्ड (फोर्ड), हंशराज हुलासचन्द एण्ड कम्पनी (बजाज), अल्फा अटोमोटिभ (रोयल इन्फिल्ड), एमएडब्ल्यू, सिजी, साथै आइएमई मोटर्स (अशोक लेइल्याण्ड) र अग्नी इन्कर्पोरेट (महिन्द्रा) समेत नयाँ संस्थामा आबद्ध हुने पक्का भएको छ।
स्रोतका अनुसार, नाडाका बहालवाला अध्यक्ष करण चौधरी (सुजुकी गाडीका आधिकारिक बिक्रेता सिजी होल्डिङ्सका सञ्चालक) समेत नयाँ संस्थामा आबद्ध हुन सकारात्मक रहेका छन्।
हालसम्म औपचारिक रूपमा घोषणा नगरिए पनि, नयाँ संस्थाले नाडाबाट पूर्ण रूपमा अलग हुने होइन, बरु अटोमोबाइल आयातकर्ताहरूका लागि विशेष उद्देश्यसहित गठन गरिएको बताइएको छ। सदस्य बन्न नाडा छोड्न नपर्ने दाबी गरिएको छ, तर यसले भविष्यमा नाडाको भूमिकामा असर पार्ने देखिन्छ।
अटोमोबाइल व्यवसायमा दुई फरक संगठन स्थापना भएपछि अब बजारमा नयाँ प्रतिस्पर्धा र रणनीतिक साझेदारीहरू देखिने संकेत गरेका छन्।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
