काठमाडौं । गण्डकी प्रदेश सरकारले मिटरमा नचल्ने ट्याक्सीको जरिवाना झन्डै ५ गुणाले बढाएको छ । भौतिक पूर्वाधार विकास तथा यातायात व्यवस्था मन्त्रालयको सिफारिसमा गण्डकी प्रदेश सरकारले ‘गण्डकी प्रदेश सवारी तथा यातायात नियमावली-२०८०,’ जारी गर्दै जरिवाना रकम बढाएको हो ।
नियमावली अनुसार मिटर प्रणालीमा नचल्ने ट्याक्सीले तिर्नुपर्ने जरिवानालाई २ हजार रुपैयाँबाट बढाएर १० हजार पुर्याइएको छ । साथै, ६ महिना निलम्बनसम्म गर्न सक्ने व्यवस्था गरिएको छ ।
हालसम्म मिटरमा चल्न नमान्ने ट्याक्सीलाई २ हजार १०० रुपैयाँ जरिवाना तिराउने गरिएको थियो । अबदेखि जरिवानाको न्यूनतम दर १० हजार पुर्याउने र ६ महिनासम्म मार्ग इजाजत रद्द गर्ने नियम बनाइएको हो ।
पोखराका यातायात व्यवसायीसँग भएको छलफलपछि मन्त्रालयले गत गत भदौ १ गतेदेखि ट्याक्सी मिटर प्रणालीमा सञ्चालन गर्ने निर्णय गरेको थियो ।
ट्याक्सी व्यवसायीले मिटरमा उठे बराबरको भाडा लिएर यात्रु बोक्ने पटक–पटकको प्रतिबद्धता कार्यान्वयन नगरेपछि मन्त्रालयले नियम थप कसिलो बनाएको हो । हाल पोखरामा २ हजार ५०० सहित गण्डकी प्रदेशभर करिब ३ हजार ५०० ट्याक्सी सञ्चालनमा छन् ।
नियमावली बनेसँगै विसं २०७६ मा जारी भएको गण्डकी प्रदेशको सवारी तथा यातायात व्यवस्था ऐन कार्यान्वयनमा आएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
