पूर्वराजा ज्ञानेन्द्रसँग धवलशम्शेर राणाको भेट, भने– ‘फलदायी रह्यो’

काठमाडौं । जय नेपाल पार्टीका अध्यक्ष धवलशम्शेर राणाले पूर्वराजा ज्ञानेन्द्र शाहसँग भेटवार्ता गरेका छन्। राप्रपाबाट अलग भएर नयाँ राजनीतिक दल गठन गरेका राणाले हिमानी ट्रस्टको कार्यक्रममा सहभागी भएपछि पूर्वराजासँग भेट गरेका हुन्।

भेटपछि राणाले सामाजिक सञ्जालमार्फत पूर्वराजासँगको भेटको तस्बिर सार्वजनिक गर्दै भेटवार्ता ‘फलदायी’ भएको बताएका छन्। उनले भेटमा समसामयिक राजनीतिक विषयमा छलफल भएको संकेत गरे पनि छलफलका विषयवस्तुबारे विस्तृत जानकारी भने दिएका छैनन्।

जय नेपाल पार्टीले यसअघि नै संवैधानिक राजसंस्था र हिन्दू अधिराज्यको पक्षमा देशव्यापी हस्ताक्षर अभियान सञ्चालन गर्ने निर्णय गरिसकेको छ। पार्टीले उक्त अभियानलाई थप प्रभावकारी रूपमा अघि बढाउने तयारीसमेत गरिरहेको जनाएको छ।

पूर्वराजासँग राणाको पछिल्लो भेटलाई जय नेपाल पार्टीले अघि सारेका राजनीतिक एजेन्डासँग जोडेर हेरिएको छ। विशेषगरी संवैधानिक राजसंस्था र हिन्दू अधिराज्यको पक्षमा पार्टीले अभियान अघि बढाउने निर्णय गरेको अवस्थामा भएको यो भेटलाई राजनीतिक रूपमा अर्थपूर्ण मानिएको छ।

यद्यपि, पूर्वराजा शाह र राणाबीच भएको भेटमा के–कस्ता विषयमा विस्तृत छलफल भयो भन्नेबारे दुवै पक्षबाट थप विवरण सार्वजनिक भएको छैन।