महानगर यातायातले पोखरा, चितवन र भैरहवामा सञ्चालनमा ल्यायो विद्युतीय बस

काठमाडौं । महानगर यातायात प्राइभेट लिमिटेडले आफ्नो सेवा काठमाडौं उपत्यकाबाहिर विस्तार गरेको छ।

कम्पनीले शनिबार काठमाडौंमा आयोजित कार्यक्रममा पोखरा, चितवन र भैरहवा जिल्लामा २० वटा विद्युतीय माइक्रो बसमार्फत सेवा विस्तार गरेको छ ।

कम्पनीका अध्यक्ष सन्तोष खतिवडाले यात्रुको मागअनुसार बस सङ्ख्या क्रमशः बढाउँदै लैजाने तथा अन्य शहरमा समेत सेवा विस्तार गर्ने योजना रहेको बताए।

उनले छिट्टै काठमाडौंलाई अन्य प्रमुख शहरसँग सहज रूपमा जोड्ने गरी ठूला विद्युतीय बस सञ्चालनमा ल्याउने तयारी भइरहेको पनि जानकारी दिए।

त्यसैगरी, निकट भविष्यमा कम्पनीलाई पब्लिक लिमिटेड कम्पनीमा रूपान्तरण गर्ने योजना रहेको समेत उनले उल्लेख गरे।

दश वर्षदेखि काठमाडौंमा सेवा दिँदै आएको कम्पनीले यसअघि १०१ वटा बसमार्फत सेवा सञ्चालन गर्दै आएको थियो। कम्पनीका बसहरू काठमाडौंको चक्रपथ क्षेत्रमा तथा थानकोटदेखि धुलिखेलसम्म सञ्चालन हुँदै आएका छन्।