७६ बच्चाको हत्यारासँग एउटै मञ्‍चमा उभिन्‍न : बालेन

काठमाडौं । काठमाडौं महानगरपालिकाका पूर्वमेयर बालेन शाहले नेकपा (एमाले) का अध्यक्ष केपी शर्मा ओलीसँग एउटै मञ्चमा बसेर पब्लिक डिबेट नगर्ने स्पष्ट पारेका छन्।

राष्ट्रिय स्वतन्त्र पार्टीका तर्फबाट आगामी फागुन २१ गते हुने निर्वाचनमा प्रधानमन्त्रीका उम्मेदवारका रूपमा अघि सारिएका शाहले सामाजिक सञ्जालमार्फत प्रतिक्रिया दिँदै ओलीसँग सार्वजनिक बहसमा सहभागी नहुने बताएका हुन्।

ओलीका अभिव्यक्तिका आधारमा आफूलाई देश जलाउने र आतङ्कवादीका रूपमा चित्रित गरिएको आरोप लगाउँदै शाहले त्यसप्रति कडा आपत्ति जनाएका छन्। उनले भदौ २३ गते बालबालिकाको हत्या तथा भदौ २४ गते भएको आगजनी घटनाको जिम्मेवारी आफू र आफ्नो पक्षमाथि थोपरिएको दाबी गर्दै गम्भीर असन्तुष्टि व्यक्त गरेका छन्।

ओली पब्लिक डिबेटका लागि तयार भएको भनिए पनि त्यसमा सहभागी नहुने अडान लिँदै शाहले भनेका छन्, ‘७६ जना बालबालिकाको हत्यारा र उसका मतियारसँग एउटै मञ्चमा उभिनु भनेको म पनि त्यस अपराधमा सामेल भएको अर्थ लाग्छ।’

बालबालिकाको हत्या र त्यससँग सम्बन्धित व्यक्तिहरूसँग कुनै पनि हालतमा एउटै मञ्च साझा नगर्ने अडान आफूले स्पष्ट रूपमा लिएको शाहको भनाइ छ।