पूर्वप्रधानन्यायाधीश सुशीला कार्की अन्तरिम सरकार प्रमुखमा नियुक्त, आजै सपथ

काठमाडौं । राष्ट्रपति रामचन्द्र पौडेलले जेन-जी आन्दोलनसहितका सरोकारवालासँग परामर्श गरेर पूर्वप्रधानन्यायाधीश सुशीला कार्कीलाई अन्तरिम सरकार प्रमुखमा नियुक्त गरेका छन्। कार्कीले आजै साँझ राष्ट्रपति निवास शितल निवासमा पद तथा गोपनीयताको सपथ लिने भएकी छन्।

२४ भदौमा नेकपा एमाले अध्यक्ष केपी शर्मा ओलीले प्रधानमन्त्री पदबाट राजीनामा दिएपछि उत्पन्न सत्ता रिक्ततामध्ये कार्कीलाई नयाँ नेतृत्वका रूपमा अघि सारिएको हो। ओलीको राजीनामा स्वीकृत भएसँगै उनको नेतृत्वमा बनेको गठबन्धन सरकार स्वतः विघटन भएको थियो।

अन्तरिम सरकार गठनका लागि जेन-जीको माग र आन्दोलनलाई सम्बोधन गर्ने क्रममा कार्कीलाई २५ भदौमा भएको बृहत् भर्चुअल सर्वेबाट प्रमुख उम्मेदवारका रूपमा प्रस्ताव गरिएको थियो। उनलाई काठमाडौं महानगर प्रमुख बालेन शाह, पूर्वप्रधानमन्त्री बाबुराम भट्टराई, जसपा अध्यक्ष उपेन्द्र यादवलगायतले समर्थन जनाएका छन्।

७३ वर्षीया कार्की सन् २०१६ मा नेपालकी पहिलो महिला प्रधानन्यायाधीश बनेकी थिइन्। उनले अख्तियार दुरुपयोग अनुसन्धान आयोगका तत्कालीन प्रमुख आयुक्त लोकमानसिंह कार्कीको नियुक्ति बदर गर्ने, सुडाल घोटालासहितका मुद्दामा कडा फैसला गर्ने गरी न्यायपालिकामा निडर छवि बनाएकी थिइन्।

कार्कीविरुद्ध २०७४ जेठमा तत्कालीन सत्ता गठबन्धनले महाअभियोग प्रस्ताव दर्ता गरे पनि सर्वोच्च अदालतको आदेशपछि प्रक्रिया अघि बढ्न सकेको थिएन। उनी २०७४ जेठ २२ मा प्रधानन्यायाधीशबाट अवकाश पाएकी थिइन्।

अन्तरिम सरकार प्रमुखमा नियुक्त भएपछि कार्कीले सपथलगत्तै जेन-जी प्रतिनिधि तथा सरोकारवालासँग छलफल गरेर मन्त्रिपरिषद् गठनको गृहकार्य सुरु गर्ने तयारी रहेको बताइएको छ।