उपसभामुखको विषयमा छलफल गर्न माओवादी केन्द्रले विपक्षी दलको बैठक बोलायो

काठमाडौं ।उपसभामुख इन्दिरा रानामगरको पदीय आचरणलाई लिएर उठिरहेको विवादबीच प्रमुख विपक्षी दल नेकपा माओवादी केन्द्रले विपक्षी दलहरूको बैठक बोलाएको छ।

सत्तारूढ दल नेकपा एमाले र नेपाली कांग्रेस उपसभामुख रानामगरलाई पदबाट हटाउने तयारीमा लागिरहेका बेला माओवादी केन्द्रले बैठकको आह्वान गरेको हो।

राष्ट्रिय स्वतन्त्र पार्टीका सांसद मनीष झाले दिएको जानकारी अनुसार, बैठक सोमबार अपराह्न ३ बजे सिंहदरबारस्थित माओवादी केन्द्रको संसदीय दलको कार्यालयमा बस्नेछ।

“उता (सत्तापक्ष कांग्रेस-एमाले) हस्ताक्षर संकलन भइरहेको छ,” सांसद झाले भने, “यता किन र केका लागि हस्ताक्षर संकलन भइरहेको छ भन्नेबारे छलफल गर्न माओवादीको पहलमा विपक्षी बैठक बोलाइएको हो।”

यसबीच, नेपाली कांग्रेस संसदीय दलको सिंहदरबारस्थित कार्यालयमा कांग्रेस–एमालेसहितको सत्तारूढ गठबन्धनको बैठक पनि जारी रहेको छ।

सत्तारूढ गठबन्धनले उपसभामुख रानामगरको पछिल्लो व्यवहार र निर्णयप्रति असन्तुष्टि जनाउँदै उनलाई हटाउने प्रयास थालेको जनाइएको छ, तर यस विषयमा औपचारिक निर्णय आउन बाँकी छ।