तिहारमा दुई दिन काठमाडौं उपत्यकाको फोहर नउठ्ने, सडकमा नफाल्न महानगरको आग्रह

काठमाडौं । तिहारका कारण काठमाडौं उपत्यकाको फोहर व्यवस्थापन दुई दिन ठप्प हुने भएको छ।

कात्तिक २४ र २५ गते फोहर विसर्जनस्थलमा काम बन्द हुने भएपछि उपत्यकाबाट संकलित फोहरको अन्तिम व्यवस्थापन प्रभावित हुने भएको हो।

काठमाडौं महानगरपालिकाको वातावरण व्यवस्थापन विभागका प्रमुख सरिता राईका अनुसार तिहार पर्वमा बिदा हुने भएकाले बन्चरेडाँडास्थित फोहर व्यवस्थापनस्थलमा काम रोकिनेछ। उक्त स्थानमा कार्यरत कर्मचारीले समेत बिदा पाउने भएपछि दुई दिन फोहर व्यवस्थापन हुन नसक्ने भएको हो।

बन्चरेडाँडा काठमाडौं उपत्यकाको फोहर विसर्जन गर्ने अन्तिम स्थल हो। यहाँ फोहर व्यवस्थापनको काम बन्द हुँदा उपत्यकाबाट संकलित फोहरको व्यवस्थापनमा समेत असर पर्नेछ।

महानगरपालिकाका अनुसार कात्तिक २६ गतेदेखि भने फोहर व्यवस्थापनको काम नियमित हुनेछ। दुई दिनको अवरोधपछि पुनः सामान्य रूपमा फोहर व्यवस्थापन गरिनेछ।

यस अवधिमा घर, पसल तथा सार्वजनिकस्थलबाट निस्कने फोहर जथाभावी सडकमा नफाल्न महानगरपालिकाले नगरवासीलाई आग्रह गरेको छ।

फोहर विसर्जनस्थल बन्द रहने समयलाई ध्यानमा राखेर आफ्नो घर तथा वरपरको फोहर व्यवस्थित रूपमा राख्न पनि महानगरको अनुरोध छ।