राष्ट्रियस्तरका विकास बैंकहरूको नाफा ६३.६८ प्रतिशतले बढ्यो, गरिमा सबैभन्दा बढी नाफामा

काठमाडौं । राष्ट्रियस्तरका ८ विकास बैंकले आर्थिक वर्ष २०८२/८३ मा कुल ८ अर्ब ६५ करोड ९३ लाख ३९ हजार रुपैयाँ खुद नाफा कमाएका छन्। बैंकहरूले सार्वजनिक गरेको अपरिष्कृत वित्तीय विवरणअनुसार अघिल्लो आर्थिक वर्षको तुलनामा विकास बैंकहरूको समग्र नाफामा उल्लेखनीय वृद्धि भएको हो।

आर्थिक वर्ष २०८१/८२ मा यी बैंकहरूले संयुक्त रूपमा ५ अर्ब २८ करोड ५५ लाख ४५ हजार रुपैयाँ खुद नाफा कमाएका थिए। गत आर्थिक वर्षमा भने नाफा ६३.६८ प्रतिशत अर्थात् करिब ३ अर्ब ३७ करोड रुपैयाँले बढेको देखिएको छ।

नाफा वृद्धिदरका आधारमा ज्योति विकास बैंक सबैभन्दा अगाडि रहेको छ। बैंकले गत आर्थिक वर्षमा १ अर्ब ५९ करोड ५२ लाख रुपैयाँ खुद नाफा कमाएको छ, जुन अघिल्लो वर्षको १० करोड २० हजार रुपैयाँको तुलनामा ९०५.७५ प्रतिशतले बढी हो।

लुम्बिनी विकास बैंकको नाफा पनि उल्लेख्य रूपमा बढेको छ। बैंकले गत वर्ष ८५ करोड १० लाख १५ हजार रुपैयाँ खुद नाफा कमाएको छ, जुन अघिल्लो वर्षको २४ करोड ११ लाख ६ हजार रुपैयाँको तुलनामा २५२.९६ प्रतिशतले बढी हो।

शाइन रेसुङ्गा डेभलपमेन्ट बैंकले १ अर्ब १८ करोड १२ लाख ७९ हजार रुपैयाँ खुद नाफा आर्जन गरेको छ। अघिल्लो आर्थिक वर्षको ६४ करोड ५६ लाख २७ हजार रुपैयाँको तुलनामा बैंकको नाफा ८२.९६ प्रतिशतले बढेको छ।

महालक्ष्मी विकास बैंकको खुद नाफा ४८.४६ प्रतिशतले वृद्धि भई ६२ करोड ९९ लाख ५१ हजार रुपैयाँ पुगेको छ। अघिल्लो आर्थिक वर्षमा बैंकले ४२ करोड ४३ लाख १८ हजार रुपैयाँ नाफा कमाएको थियो।

सांग्रिला डेभलपमेन्ट बैंकले गत आर्थिक वर्षमा ८८ करोड ९९ लाख ३७ हजार रुपैयाँ खुद नाफा कमाएको छ। अघिल्लो वर्षको ६० करोड ६६ लाख ७१ हजार रुपैयाँको तुलनामा बैंकको नाफा ४६.९६ प्रतिशतले वृद्धि भएको छ।

सबैभन्दा बढी नाफा गरिमा विकास बैंकको

गत आर्थिक वर्षमा सबैभन्दा बढी खुद नाफा कमाउने विकास बैंकको रूपमा गरिमा विकास बैंक अग्रस्थानमा रहेको छ। बैंकले १ अर्ब ६८ करोड ८६ लाख ६६ हजार रुपैयाँ खुद नाफा कमाएको छ। अघिल्लो आर्थिक वर्षको १ अर्ब २४ करोड ७६ लाख ९२ हजार रुपैयाँको तुलनामा बैंकको नाफा ३५.३४ प्रतिशतले बढेको हो।

कामना सेवा विकास बैंकले पनि सकारात्मक वित्तीय प्रदर्शन गर्दै ८९ करोड ४१ लाख ७८ हजार रुपैयाँ खुद नाफा कमाएको छ। यो अघिल्लो वर्षको ६६ करोड ९७ लाख ५१ हजार रुपैयाँको तुलनामा ३३.५० प्रतिशतले बढी हो।

मुक्तिनाथ विकास बैंकको खुद नाफा १२.४४ प्रतिशतले वृद्धि भई १ अर्ब ५१ करोड ८३ लाख ६१ हजार रुपैयाँ पुगेको छ। अघिल्लो आर्थिक वर्षमा बैंकले १ अर्ब ३५ करोड ३ लाख ६० हजार रुपैयाँ खुद नाफा आर्जन गरेको थियो।

विकास बैंकहरूको नाफामा आएको सुधारले यस क्षेत्रको वित्तीय अवस्था क्रमशः सुदृढ बन्दै गएको संकेत गरेको छ। अधिकांश बैंकले नाफा बढाउन सफल हुनु आम्दानी वृद्धि, खर्च व्यवस्थापन तथा सञ्चालन दक्षतामा सुधारको परिणामका रूपमा हेरिएको छ।

बैंकिङ क्षेत्रका जानकारहरूका अनुसार नाफा वृद्धिलाई दीर्घकालीन रूपमा कायम राख्न विकास बैंकहरूले खराब कर्जा नियन्त्रण, गुणस्तरीय कर्जा विस्तार तथा वैकल्पिक आम्दानीका स्रोत बढाउने रणनीतिमा थप ध्यान दिनुपर्ने देखिन्छ।