काठमाडौं । नेपाल हङकङमा जारी टी-२० अन्तर्राष्ट्रिय क्रिकेट शृंखलाको फाइनलमा प्रवेश गरेको छ । ओपनर कुशल भुर्तेलको अलराउन्ड प्रदर्शनले लिग चरणको दोस्रो खेलमा पपुवा न्युगिनी (पीएनजी)लाई ८५ रनले पराजित गरेको नेपाल २ खेलमा ३ अंकका साथ शीर्षस्थानमा रहँदै फाइनलमा पुगेको हो ।
जितको लागि १९९ रनको विशाल विजयी लक्ष्य पछ्याएको पपुवा न्युगिनी १६.१ ओभरमा ११३ रनमा अल आउट भयो । पीएनजीका हिरी हिरीले २८ रन बनाए । ओपनर सेसे बाउले २१ र टोनी उराले १३ रन थपे । नोसाइना पोकानाले १२ रन जोडे ।
नेपालका कुशल भुर्तेलले ४ ओभरमा १२ रन खर्चेर ४ विकेट लिए । प्रतिश जि.सीले ४ ओभरमा ४० रन खर्चेर २ विकेट लिए । गुलशन झा र आकाश चन्दले १-१ विकेट लिए ।
त्यसअघि, दुई ब्याटरले अर्धशतक बनाउँदा टस हारेर ब्याटिङमा उत्रिएको नेपालले निर्धारित २० ओभरमा ६ विकेट गुमाएर १९८ रन बनाएको थियो ।
नेपालका ओपनर भुर्तेलले ३९ बलमा समान चार चौका र छक्कासहित ५९ रन बनाए । ट्वान्टी–२० अन्तर्राष्ट्रिय क्रिकेटमा भुर्तेलको यो आठौँ अर्धशतक हो ।
सन्दीप जोराले २६ बलमा तीन चौका र चार छक्कासहित ५६ रन बनाए । ट्वान्टी–२० अन्तर्राष्ट्रिय क्रिकेटमा सन्दीपको यो दोस्रो अर्धशतक हो ।
शृंखलाअन्तर्गत नेपाल र हङकङबीच भएको पहिलो खेल वर्षाका कारण रद्ध भएको थियो। अब पीएनजी र हङकङबीच हुने खेलको विजेताले नेपालसँग उपाधिका लागि प्रतिस्पर्धा गर्ने छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
