काठमाडौँ। काठमाडौँ महानगरपालिकाका उपमेयर सुनिता डंगोलले कोठामा बसेर निर्देशन नदिन मेयर बालेन्द्र शाह (बालेन)लाई चेतावनी दिएकी छन्।
बिहीबार महानगरका प्रमुख प्रशासकीय अधिकृत सरोज गुरागाईं ३ महिना १४ दिनपछि आज कार्यालय पुगेका थिए। सो क्रममा नगर प्रहरीले उनलाई रोक्न खोजेको थियो। तर नगर प्रहरीको अवरोधबिच प्रशासकीय अधिकृत गुरागाईँलाई कर्मचारी र जनप्रतिनिधिले कार्यकक्षमा प्रवेश गराएका थिए। प्रवेश गरेलगत्तै उपमेयर सुनिता डंगोलसहितको बैठक बसेको थियो।
बैठकमा उपमेयर डंगोलले प्रमुख प्रशासकीय अधिकृत गुरागाईंलाई हाजिर हुन नदिएर हजारौँ कर्मचारी र लाखौँ काठमाडौँवासीले दुःख पाएको बताएकी छन्। सो क्रममा उनले भनिन्, 'हजारौँ कर्मचारी र लाखौँ काठमाडौँवासीले दुःख पाएका छन्। क्यान्सर पीडितलाई पनि हामीले पैसा दिन सकेका छैनौँ। अझै छानबिन गर्नुपर्ने भए गर्ने हो। तर, यो पीडामा राख्नु हुँदैन।'
उनले आजको यो तमासा मेयरको आदेश हो भने मेयर अघि आउनुपर्ने नभए होइन कोठामा बसेर आदेश दिन नपाइने बताइन्। उनले भनिन्, 'यो तमासा हामीले हेर्नुपर्ने? मेयरको आदेश हो भने मेयर अघि आउनुपर्छ। होइन भने कोठामा बसेर आदेश दिन पाइँदैन। पहिला आजको विषय समाधान गर्छौं। त्यसपछि बोर्ड बैठक बस्छौँ। आजका लागि यो समस्या समाधान गर्नुपर्छ।’
बैठकमा उपमेयर डंगोलले हरेक घटनाक्रमबारे आफूहरू जानकार रहेको भन्दै कोठामा बसेर निर्देशन नदिन आग्रह गरिन्।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
