काठमाडौँ । राप्रपाले हालै तीनकुनेमा भएको घटनासम्बन्धी ५ बुँदे मागसहित प्रधानमन्त्रीलाई ध्यानाकर्षण गराएको छ। पार्टी अध्यक्ष राजेन्द्र लिङ्देन नेतृत्वको टोलीले सिंहदरबार पुगेर कार्यवाहक प्रधानमन्त्री प्रकाशमान सिंहलाई ध्यानाकर्षण पत्र हस्तान्तरण गरेको हो।
ध्यानाकर्षण पत्रमा घटनाको निष्पक्ष छानबिनका लागि सर्वोच्च अदालतका पूर्व न्यायाधीशको नेतृत्वमा मानव अधिकार आयोग र नागरिक समाजको सहभागितामा स्वतन्त्र छानबिन आयोग गठन गर्नुपर्ने माग गरिएको छ। साथै, छानबिन सुनिश्चित गर्न गृहमन्त्रीको राजीनामा माग गर्दै घटनामा संलग्न प्रहरी प्रमुख तथा प्रशासनिक नेतृत्वलाई निलम्बन गर्नुपर्ने उल्लेख छ।
राप्रपाले घटनाका मृतकहरू सबिन महर्जन र सुरेश रजकलाई सहिद घोषणा गरी क्षतिपूर्ति दिनुपर्ने, घाइतेहरूको निःशुल्क र प्रभावकारी उपचारको व्यवस्था गर्नुपर्ने माग गरेको छ। साथै, राप्रपा नेताहरू रविन्द्र मिश्र, डा. धवलसम्शेर राणा लगायतका विरुद्ध लगाइएका मुद्दा खारेज गर्दै निर्दोषहरूको तत्काल रिहाइ गर्नुपर्ने माग पत्रमा उल्लेख छ।
गत शुक्रबार तीनकुनेमा राजावादी समूहको प्रदर्शनका क्रममा प्रहरी र प्रदर्शनकारीबीच झडप हुँदा दुई जनाको मृत्यु भएको थियो भने कैयौं घाइते भएका थिए। प्रदर्शनका क्रममा तोडफोडसमेत भएको थियो, जसबारे विभिन्न निकायहरूले छानबिन गरिरहेको बताएका छन्।
सम्माननीय प्रधानमन्त्रीज्यू,
प्रधानमन्त्री तथा मन्त्रिपरिषद्को कार्यालय
सिंहदरबार, काठमाडौँ
विषयः ध्यानाकर्षण सम्बन्धमा ।
चैत १५ गते तिनकुने, कोटेश्वर क्षेत्रमा भएको प्रदर्शनलाई हिंसात्मक बनाउन राज्यपक्षबाट भएको क्रियाकलापप्रति राष्ट्रिय प्रजातन्त्र पार्टी गम्भीर दुःख व्यक्त गर्दछ।
प्रदर्शनकारीहरूले आफ्नो सभा सुरु गर्ने क्रममा राष्ट्रियगान गाउन सुरु गरेको बेला प्रशासनले मञ्चलाई लक्षित गरेर सर्वसाधारणको घरको छतबाट अन्धाधुन्द म्याद सकिएका अश्रु ग्यासका सेलहरूको वर्षा गर्नु, सबिन महर्जनलाई ताकेर गोलिहानी हत्या गरिनु, आँखै अगाडि घर आगलागी हुँदा र उक्त घरमा मानिस रहेको जानकारी पाउँदा पनि नियन्त्रण र उद्दार गर्न नसकेर पत्रकार सुरेश रजकको ज्यान जानु, कार्यक्रमसँग कुनै सम्बन्ध नरहेका र कार्यक्रम स्थलबाट धेरै टाढा रहेका रेविका खत्री र उनका दाइलाई गोली हान्नु, प्रहरीले अलगअलग ठाउँमा चलाएको गोलीबाट दुई दर्जनभन्दा बेसी मानिसहरू घाइते हुनु, प्रहरीलेनै पत्रकारलाई उपलब्ध गराएको विवरण अनुसार निहत्ता प्रदर्शनकारीहरू माथि चैत्र १५ गते एकै दिन ७४६ राउन्ड अश्रुग्यास, १९२ ब्ल्याङ्क राउन्ड फायरिङ, ५८ राउन्ड हवाई फायर, कार्टिज (छर्रा) २३९ र पेस्तोलबाट २ राउन्ड गोली चलेको थियो। यो नेपाल प्रहरीको मात्र विवरण हो। सशस्त्र प्रहरीबाट चलेको गोलीको विवरण अझै सार्वजनिक भएको छैन।
चैत्र १५ गते यति धेरै फायरिङ गर्नुपर्ने अवस्था किन आयो? प्रदर्शनकारी पछि हटिरहेका बेला पनि किन गोली चल्यो? गल्लीमा रहेका आमनागरिक पनि कसरी घाइते भए? सभामा भाग लिएको, प्रदर्शनमा सहभागी भएको जस्ता आधारमै राप्रपा नेता रविन्द्र मिश्र, डा. धवल शमशेर राणा लगायतलाई “राज्य विरुद्धको अपराध” जस्तो गम्भीर प्रकृतिको मुद्दा किन लगाइयो? यस्ता प्रश्नको उचित जवाफ नआएसम्म सरकार स्वयं उक्त दिनको प्रदर्शनलाई हिंसामा परिणत गर्न योजनाबद्ध तयारीमा थियो भन्ने अभियोगबाट मुक्त हुन सक्ने देखिँदैन। सरकारको उक्त क्रियाकलाप प्रजातन्त्र मानव अधिकार र
विचार अभिव्यक्तिको स्वतन्त्रताका विरुद्ध देखिन्छ। हामी यस प्रकारको विचार अभिव्यक्ति स्वतन्त्रता मानव अधिकार र प्रजातन्त्र विरुद्धको सरकारी क्रियाकलापको भत्सर्ना गर्दछौं।
भविष्यमा यस प्रकारका घटनाहरू नदोहोरीनका लागि उक्त दिनको घटनाको निष्पक्ष र स्वतन्त्र छानबिन हुन आवश्यक छ। दमनमै संलग्न सरकारको एकपक्षीय छानबिनले पीडितलाई न्याय दिन नसक्ने हुनाले स्वतन्त्र निष्पक्ष न्यायिक छानबिन आयोगको गठन लगायत निम्न विषयहरू नेपाल सरकार समक्ष राप्रपा माँग गर्दछ।
१) सर्वोच्च अदालतको पूर्व न्यायाधीशको अध्यक्षतामा मानव अधिकार आयोग, नागरिक समाज सम्मिलित स्वतन्त्र छानबिन आयोगको गठन,
२) छानबिनका लागि गृहमन्त्रीको राजीनामा, चैत्र १५ गतेको दमनमा नेतृत्व गर्ने प्रहरी प्रमुख र प्रशासनिक नेतृत्वको निलम्बन,
३) मृतकहरू सबिन महर्जन र सुरेश रजकलाई सहिद घोषणा तथा क्षतिपूर्तिको व्यवस्था,
४)राप्रपा नेताहरू रवीन्द्र मिश्र र डा. धवलसम्शेर राणा लगायत अन्यमाथिको झुठा मुद्दा खारेजी र निर्दोषहरूको रिहाई,
५) घाइतेहरूको निःशुल्क र प्रभावकारी उपचारको व्यवस्था।
राजेन्द्र लिङ्देन
अध्यक्ष
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
