काठमाडौं । धितोपत्र दलाल व्यवसायी (ब्रोकर)मर्जर सम्बन्धी निर्देशिका पारित भएको छ । बुधबार बसेको नेपाल धितोपत्र बोर्ड सञ्चालक समितिको बैठकले उक्त निर्देशिका पारित गरेको हो ।
चुक्ता पूँजी नपुगेका ब्रोकर कम्पनीलाई मर्जरमा लैजानका लागि बोर्डले निर्देशिका पारित गरेको हो । यससँगै अब ब्रोकर कम्पनीलाई मर्जरमा जान बाटो खुलेको छ ।
नेपाल धितोपत्र बोर्डले ब्रोकर कम्पनीहरूलाई २०८२ असार भित्र तोकिएको चुक्ता पूँजी पुर्याउन समय सीमा दिएको छ । संशोधित धितोपत्र व्यवसायी (धितोपत्र दलाल तथा धितोपत्र व्यापारी) नियमावली अनुसार सीमित कार्य गर्ने धितोपत्र दलालको चुक्ता पूँजी २० करोड, पूर्वकार्य गर्ने धितोपत्र दलालको चुक्ता पूँजी ६० करोड र धितोपत्र व्यापारीको चुक्ता पूँजी १ अर्ब ५० करोड रुपैयाँ तोकिएको छ ।
सो अनुसार चुक्ता पूँजी पुर्याउन नसकेका ब्रोकरलाई मर्जरमा लैजान बोर्डले निर्देशका बनाएको हो । बोर्डले २०७९ भदौमा नयाँ ब्रोकर कम्पनीहरूको लागि लाइसेन्स खुला गर्दै सञ्चालनमा रहेका ५० ब्रोकरलाई ३ वर्षभित्र तोकिएको चुक्ता पूँजी कायम गर्न निर्देशन दिएको थियो ।
पुराना ५० वटा ब्रोकर मध्ये १३ वटाले मात्रै तोकिएको चुक्ता पूँजी पुर्याएका छन् भने ३७ वटाको पुगेको छैन । यद्यपि, उनीहरूले बोनस सेयर, हकप्रद सेयर जारी र मर्जरबाट चुक्ता पूँजी पुर्याउने योजना बोर्डमा पेश गरेका छन् ।
बोर्डका अनुसार पूँजी नपुगेका कम्पनी मध्ये १२ वटाले चालु आर्थिक वर्ष भित्रै तोकिएको चुक्ता पूँजी पुर्याउने प्रतिबद्धता जनाएका छन् । त्यस्तै, २५ कम्पनीले भने मर्जर, बोनस र हकप्रदमार्फत पूँजी पुर्याउने योजना पेश गरेको बोर्डले जनाएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
