काठमाडौं । अर्थ मन्त्रालयले आगामी आर्थिक वर्ष २०८२/८३ को बजेट निर्माण प्रक्रियालाई तीव्रता दिएको छ।
यसै क्रममा आज भौतिक पूर्वाधार तथा यातायात मन्त्रालयसहित सम्बद्ध विभाग र निकायहरूसँग छलफल गरिएको छ। उक्त अवसरमा उपप्रधान एवं अर्थमन्त्री विष्णुप्रसाद पौडेलले अनुशासित र यथार्थपरक बजेट ल्याउने प्रतिबद्धता व्यक्त गरे। उनले आगामी आर्थिक वर्षको बजेटमा रकमान्तर तथा संशोधनको आवश्यकता नपर्ने गरी तर्जुमा गरिने बताए, जसले कार्यान्वयन सहज हुनेछ।
बजेट निर्माण प्रक्रियामा विगतका अनुभवबाट सिक्दै अघि बढ्नुपर्नेमा अर्थमन्त्री पौडेलले जोड दिए। सङ्घीय संरचनालाई ध्यानमा राखी सङ्घ, प्रदेश र स्थानीय तहबीच समन्वय कायम गर्दै बजेट बनाइने उनले बताए। मन्त्रालय, विभाग तथा अन्य निकायहरूसँगको सहकार्य अपरिहार्य हुने र सबै पक्षको अपनत्व जरुरी रहेको उनले उल्लेख गरे।
अर्थमन्त्री पौडेलका अनुसार विपद्पछिको पुनःनिर्माणलाई बजेटको प्राथमिकतामा राखी कार्यान्वयनयोग्य, प्रभावकारी र नतिजामुखी नीति निर्माण गरिनेछ। सरकारको वार्षिक नीति तथा कार्यक्रमसँग बजेटलाई समन्वय गरी लक्ष्यअनुरूप अगाडि बढाइने उनले स्पष्ट पारे।
बजेट तर्जुमा गर्दा कार्यान्वयनमा कठिनाइ आउने तथा न्यून प्राथमिकताका आयोजनाहरूलाई स्थगित गरिने अर्थमन्त्री पौडेलले बताए। साना योजनाहरू कटौती गर्दै क्रमागत योजनाहरूको सङ्ख्या घटाइनेछ। पूर्वतयारी पूरा भएका र अत्यावश्यक आयोजनाहरूलाई मात्र बजेटमा समेट्नुपर्ने उनले स्पष्ट पारे।
राष्ट्रिय स्रोत अनुमान समितिको सिफारिसअनुसार आगामी आर्थिक वर्ष २०८२/८३ का लागि १९ खर्ब ६५ करोड रुपैयाँको सीमाभित्र रहेर बजेट निर्माण गरिनेछ। बजेट प्रस्ताव गर्दा यस सीमालाई ध्यानमा राखी योजनाबद्ध तरिकाले अघि बढ्नुपर्ने अर्थमन्त्री पौडेलले सम्बन्धित मन्त्रालयहरूलाई निर्देशन दिए।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
