काठमाडौं । जीवन बीमा कम्पनीहरूले चालु अर्थिक वर्ष २०८१/८२ को ७ महिना (साउन-माघ)मा झण्डै १ खर्ब रुपैयाँको व्यवसाय गरेका छन् ।
नेपाल बीमा प्राधिकरणले सार्वजनिक गरेको तथ्यांक अनुसार चालु आवको माघसम्म १७ जीवन बीमा (१४ जीवन बीमा र ३ लघु जीवन बीमा) कम्पनीले कुल ९६ अर्ब १ करोड १८ लाख रुपैयाँ बीमा शुल्क संकलन गरेका हुन् ।
गत आवको सोही अवधिको तुलनामा चालु आवमा जीवन बीमा व्यवसाय १०.४५ प्रतिशत अर्थात ९ अर्ब ८ करोड रुपैयाँले बढेको हो । गत वर्ष माघसम्म जीवन बीमा कम्पनीहरूले कुल ८६ अर्ब ९२ करोड ३१ लाख रुपैयाँ बीमा शुलक संकलन गरेका थिए ।
चालु आवको माघसम्म १४ जीवन बीमा कम्पनीले मात्रै ९५ अर्ब ३८ करोड रुपैयाँ र ३ लघु जीवन बीमा कम्पनीले ६२ करोड ५२ लाख रुपैयाँ बीमा शुल्क संकलन गरेका छन् । माघ महिनामा मात्रै १५ अर्ब ८८ करोड रुपैयाँ प्रिमियिम संकलन गरेका छन् ।
चालु आवमा जीवन बीमा कम्पनीहरूले नयाँ व्यवसायमा पनि सुधार आएको छ । गत वर्षको तुलनामा चालु आवको ७ महिनामा कम्पनीहरूको नयाँ व्यवसाय १६.२५ प्रतिशतले बढेको छ । माघसम्म जीवन बीमा कम्पनीले नयाँ पोलिसी जारी गरी १८ अर्ब ७७ करोड रुपैयाँ प्रथम बीमा शुल्क संकलन गरेका छन् । गत वर्ष यही अवधिमा १६ अर्ब १५ करोडको नयाँ पोलिसी जारी गरेका थिए ।
यद्यपि, समग्र जीवन बीमा व्यवसाय भने पुरानै पोलिसी नवीकरणले धानेको देखिन्छ । कुल व्यवसायमा पोलिसी नवीकरणबाट उठेको बीमाशुल्कको हिस्सा ८०.४४ प्रतिशत रहेको छ । नयाँ पोलिसी बिक्रीबाट १९.५६ प्रतिशत मात्रै बीमा शुल्क संकलन गरेका छन् । माघसम्म जीवन बीमा कम्पनीहरूले पोलिसी नवीकरण शुल्क बापत ७५ अर्ब २५ करोड रुपैयाँ संकलन गरेका छन् ।
माघसम्म जीवन बीमा कम्पनीहरूको कुल सक्रिय बीमालेख संख्या १ करोड ४१ लाख ५३ हजार ८४८ वटा रहेका छन् । गत वर्षको तुलनामा यस वर्ष सक्रिय बीमालेखको संख्या ३ लाख ५९ हजार ७११ वटाले बढेको हो ।
पछिल्लो अर्थतन्त्रमा सुधारका संकेत देखिँदा बीमा व्यवसायमा पनि सुधार आएको हो । पछिल्ला महिनाहरूमा नयाँ पोलिसी बिक्री हुने क्रम बढ्दो छ ।
नेपाल लाइफकै वर्चश्व
जीवन बीमा व्यवसायमा नेपाल लाइफ इन्स्योरेन्सकै वर्चश्व रहेको छ । माघसम्म संकलित कुल बीमा शुल्क मध्ये नेपाल लाइफ एक्लैले एकचौथाई बढी बीमा शुल्क संकलन गरेको छ । नेपाल लाइफले मात्रै २६ अर्ब रुपैयाँ संकलन गरेको छ । यो कुल व्यवसायको २७.०९ प्रतिशत हिस्सा हो ।
जीवन बीमा व्यवसायमा नेशनल लाइफ इन्स्योरेन्स दोस्रो स्थानमा छ । माघसम्म यसले ११ अर्ब २३ करोड रुपैयाँ बीमा शुल्क संकलन गरेको छ ।
तेस्रो स्थानमा लाइफ इन्स्योरेन्स कर्पोरेसन (एलआइसी)ले ११ अर्ब १७ करोड रुपैयाँ बीमा शुल्क संकलन गरेका छन् । कुल व्यवसायमा नेशनलको हिस्सा ११.७० प्रतिशत र लाइफ इन्स्योरेन्सको ११.६३ प्रतिशत रहेको छ ।
साविकका ३ कम्पनी मर्ज भई दोस्रो ठूलो जीवन बीमा कम्पनी बनेको हिमालयन लाइफ भने व्यवसायमा चौथो स्थानमा रहेको छ । यसले माघसम्म ९ अर्ब ९० करोड बीमा शुल्क संकलन गरेको छ । चुक्ता पूँजी नेपाल लाइफकै हाराहारीमा रहे पनि व्यवसायमा नेपाल, नेशनल र एलआइसीभन्दा पछि परेको हो ।
माघसम्म सूर्यज्योति लाइफले ५ अर्ब ९५ करोड, एशियन लाइफ ५ अर्ब ७ करोड, सिटिजन्स लाइफ ३ अर्ब ९८ करोड, राष्ट्रिय जीवन बीमा ३ अर्ब ९२ करोड, सानिमा लाइफ ३ अर्ब ८० करोड, मेट लाइफ ३ अर्ब ३७ करोड, आइएमई लाइफ २ अर्ब ९० करोड, प्रभु महालक्ष्मी लाइफ २ अर्ब ८५ करोड र रिलायबल नेपाल लाइफ २ अर्ब ७९ करोड रुपैयाँ प्रिमियम संकलन गरेका छन् ।
यस अवधिमा सन नेपाल लाइफले सबैभन्दा कम २ अर्ब ३८ रुपैयाँ प्रिमियम उठाएको छ ।
लघुबीमाको हिस्सा नगन्य
समीक्षा अवधिमा लघु जीवन बीमा कम्पनीको व्यवसाय भने न्यून रहेको छ । गत वर्षदेखि संचालनमा आएका ३ लघुबीमा कम्पनीले चालु आवको माघसम्म कुल ६२ करोड ५२ लाख रुपैयाँ मात्रै बीमा शुल्क संकलन गरेका छन् । यो कुल व्यवसायकको ०.६५ प्रतिशत मात्र हो । यद्यपि, पछिल्ला महिनाहरूमा लघु जीवन बीमा कम्पनीहरूले व्यवसाय क्रमशः बढाउँदै लगेका छन् ।
माघसम्म गार्डियन माइक्रो लाइफले २४ करोड ५१ लाख, क्रेष्ट माइक्रो लाइफले २२ करोड ८४ लाख र लिबर्टी माइक्रो लाइफले १५ करोड १६ लाख रुपैयाँ प्रिमियम संकलन गरेका छन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
