काठमाडौं । जिल्ला ट्राफिक प्रहरी परिसर भक्तपुरले तीव्र गतिका कारण हुने दुर्घटना रोक्न तीव्र गति नियन्त्रण अभियान सुरू गरेको छ । मध्यपुरथिमि नगरपालिका–५ र ६ को सिमानामा पर्ने सल्लाघारी, पुरानोथिमि पेप्सीकोला सडक अन्तर्गत निकोसेरा चोकबाट उक्त अभियान सुरू गरिएको हो ।
जिल्ला ट्राफिक प्रहरी परिसर भक्तपुरका प्रमुख एवं प्रहरी निरीक्षक प्रदीप खत्रीले फराकिलो सडकमा सावरीसाधनको तीव्र गतिका कारण दुर्घटना बढेपछि यसलाई नियन्त्रण गर्न अभियान सुरू गरिएको बताए ।
परिसरले मध्यपुरथिमि नगरपालिकाको संयोजन एवं सहयोगमा ट्राफिक प्रहरी, नगरपालिका, प्रहरी वृत्त थिमि, डिभिजन सडक कार्यालय भक्तपुर, नगर प्रहरीसमेतको टोलीले आज निकोसेरा चोकदेखि पेप्सीकोला मनोहरा पुलसम्म २० ठाउँमा तीव्र गति नियन्त्रण सम्बन्धी जनचेतना एवं सूचनामलक बोर्डहरू राखेको छ ।
विसं २०८१ साउन १ गतेदेखि यही फागुन २ गतेसम्म सल्लाघारीबाट निकोसरा, बाहखा बजार, पुरानोथिमि, सानोठिमी हुँदै पेप्सीकोला सडकमा १६० सवारीसाधन दुर्घटना भएको उनले जानकारी दिए । पेप्सीकोलादेखि फराकिलो र चिल्लो कालोपत्र सडकमा सवारीसाधन तीव्र गतिमा सञ्चालन गरेका कारण बढी दुर्घटना भएको पाइएको छ । तीमध्ये ९० प्रतिशत मोटरसाइकल र स्कुटर दुर्घटनामा परेको तथ्यांक छ ।
दुर्घटना बढेपछि ट्राफिक कार्यालयले प्रतिघण्टा ४० किलोमिटरको गति निर्धारण गरेर अभियान सुरू गरेको प्रहरी निरीक्षक खत्रीले जानकारी दिए । मनोहरादेखि सानोठिमी, निकोसेरा सल्लाघारी रुटमा प्रतिघण्टा ४० भन्दा बढी गतिमा सवारीसाधन चलाए कारबाही गरिने उनले बताए ।
नियमा अनुसार तीव्र गति हुने फराकिला सडकलाई ४० किलोमिटर र बस्तीभित्र ३० किलोमिटर प्रतिघण्टाको गति कायम गरिएको भन्दै उनले अरनिको राजमार्ग अन्तर्गत मनोहरा खोलादेखि राधेराधे सूर्यविनायकसम्म प्रतिघण्टा ५० किलोमिटरको गति निर्धारण गरिएको बताए ।
ट्राफिक प्रहरीले जुनसुकै बेलामा पनि गति नियन्त्रणका लागि ‘राडार गन’को प्रयोग गर्ने भएकाले तीव्र गतिमा सवारीसाधान नचलाउन ट्राफिक प्रहरीले अनुरोध गरेको छ ।
चाँगुनारायण नगरपालिकाका प्रमुख जीवन खत्री, मध्यपुरथिमि नगरपालिकाका जनप्रतिनिधि रामचन्द्र थापा, डिभिजन सडक कार्यालय भक्तपरका सुपरभाइजर सजन श्रेष्ठलगायतले भक्तपुरका मुख्य सडकहरूमा यस्ता अभियान आवश्यक रहेको बताए ।
रातिमा पनि राडार गनको प्रयोग
जिल्ला ट्राफिक प्रहरी परिसर भक्तपुरले रातिको समयमा पनि राडार गनमार्फत तीव्र गति मापन गर्दै कारबाही प्रक्रिया सुरू गरेको छ । सोमबार राति ८ देख ९ बजेसम्म एक घण्टा गरेको जाँजमा ४९ सवारीसाधन तीव्र गतिका कारण कारबाहीमा परेको प्रहरी निरीक्षक खत्रीले जानकारी दिए ।
तीव्र गतिमा सवारीसधान चलाउने टिपर चालकले रातिको समयमा पैदल यात्री, साइकल, मोटरसाइकल तथा स्कुटर र अन्य सवारी साधनलाई ठक्कर दिने, सडकका पोल र सडक किनाराका बारहरू भाँच्ने र अरूको घरभित्र समेत छिर्ने गरी तीव्र गतिमा सवारीसाधन चलाउन थालेपछि टिपरको समेत रातिको समयमा गति मापन गर्न राडार गनको प्रयोग गरी कारबाही गर्न सुरू गरेको उनले बताए ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
