काठमाडौं । सन् २०२४ को अक्टोबरमा महिनामा सवा लाख विदेशी पर्यटक नेपाल घुम्न आएका छन् । नेपाल पर्यटक बोर्डको तथ्याङ्क अनुसार अक्टोबरमा कुल १ लाख २४ हजार ३९३ विदेशी पर्यटक नेपाल भित्रिएका हुन् ।
सन् २०२३ को अक्टोबरको तुलनामा यस वर्षको सोही अवधिमा पर्यटक आवगमन ६.०४ प्रतिशत अर्थात् ७.०८७ प्रतिशतले बढेको हो । सन् २०२३ को अक्टोबरमा कुल १ लाख १७ हजार ३०६ विदेशी आएका थिए ।
यस्तै, कोरोना महामारी सुरू हुनुअघिको वर्ष अर्थात् सन् २०१९ को तुलनामा पर्यटक आवगमन ७ प्रतिशतले घटेको हो । २०१९ को अक्टोबरमा १ लाख ३४ हजार पर्यटक भित्रिएका थिए ।
सन् २०२४ अक्टोबरमा सबैभन्दा धेरै भारतबाट १६ हजार ३१३ जना पर्यटक नेपाल आएका छन् । त्यस्तै, अमेरिकाबाट १६ हजार २३, बेलायतबाट ८ हजार १९, चीनबाट ७ हजार ७५०, अस्ट्रेलियाबाट ६ हजार ९२९, जर्मनीबाट ६ हजार १८, फ्रान्सबाट ५ हजार ४८५, बङ्गलादेशबाट ४ हजार ४७६, श्रीलङ्काबाट ३ हजार १२५ र इटलीबाट २ हजार ६३५ जना पर्यटक नेपाल आएका पर्यटन बोर्डले जनाएको छ ।
सन् २०२४ को १० महिनामा कुल ९ लाख ४१ हजार ३२ जना पर्यटक नेपाल आएका छन् । बोर्डका अनुसार यस वर्ष जनवरीमा ७९ हजार १००, फेब्रुअरीमा ९७ हजार ४२६, मार्चमा १ लाख २८ हजार १६७, अप्रिलमा १ लाख ११ हजार ३७६, मेमा ९० हजार २११, जुनमा ७६ हजार ७३६, जुलाइमा ६४ हजार ५९९, अगष्टमा ७२ हजार ७१९ र सेम्टेम्बरमा ९६ हजार ३०५ विदेशी नेपाल भित्रिएका हुन् ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
