काठमाडौं । कामना सेवा विकास बैंकको खुद नाफामा उल्लेख्य सुधार आएको छ । बैंकले बुधबार सार्वजनिक गरेको गत आर्थिक वर्ष २०८०/८१ को चौथो त्रैमासको अपरिष्कृत वित्तीय विवरण खुद नाफा ६६.९३ प्रतिशतले बढेको हो ।
बैंकले गत असार मसान्तसम्म ६० करोड ३२ लाख १७ हजार रुपैयाँ खुद नाफा कमाएको छ । यो अघिल्ले वर्षको तुलनामा २४ करोड १३ लाख रुपैयाँ बढी हो । बैंकले आव २०७९/८० मा ३६ करोड १३ लाख ६४ हजार रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी, संचालन नाफा बढ्नुका साथै इम्पेयरमेन्ट चार्ज घट्दा नाफामा उल्लेख्य सुधार आएको हो ।
गत वर्ष बैंकको खुद ब्याज आम्दानी २.७८ प्रतिशतले बढेर २ अर्ब १२ करोड रुपैयाँ पुगेको छ । त्यसै, बैंकको सञ्चालन नाफा ५३.०८ प्रतिशतले बढेर ९७ करोड ८४ लाख रुपैयाँ पुगेको छ ।
समीक्षा अवधिमा बैंकले ५९ अर्ब ६ करोड रुपैयाँ निक्षेप संकलन गरी ४५ अर्ब ९४ करोड रुपैयाँ कर्जा प्रवाह गरेको छ । हाल ३ अर्ब २८ करोड चुक्ता पूँजी रहेको बैंकको रिटेन्ड अर्निङ ३५ करोड ७८ लाख र जगेडा कोषमा १ अर्ब ७५ करोड रुपैयाँ सञ्चित छ ।
समीक्षा अवधिमा बैंकको वितरणयोग्य नाफा ३५ करोड ७८ लाख रुपैयाँ रहेको छ । यसबाट बैंकले १०.९१ प्रतिशत लाभांश दिन सक्छ ।
खुद नाफासँगै बैंकको प्रतिसेयर आम्दानी ७.३७ रुपैयाँले बढेर १८.३८ रुपैयाँ पुगेको छ । समीक्षा अवधिमा बैंकको प्रतिसेयर नेटवर्थ १६४.४८ रुपैयाँ, खराब कर्जा ३.२१ प्रतिशत, बेसरेट ९.२ प्रतिशत र सीडी रेसियो ८३.२८ प्रतिशत रहेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
