काठमाडौं । सशस्त्र प्रहरीका पूर्वडीआईजी रञ्जन कोइराला केन्द्रीय कारागार, नख्खु चलान भएका छन् ।
उनले यसअघि डिल्लीबजार कारागारमा करिब साढे ८ वर्ष कैद भुक्तान गरेर सर्वोच्च अदालतले जन्मकैदको सजाय घटाइदिएपछि २०७७, साउन ८ मा कैदमुक्त भएका थिए ।
उनी अब २०९० मंसिर १२ सम्म कारागारमा बस्नुपर्ने छ । पत्नी गीता ढकालको हत्या अभियोगमा २०६८ माघमा पक्राउ परेका उनलाई काठमाडौं जिल्ला अदालतले २०७१ वैशाख ७ मा दोषी ठहर गर्दै जन्मकैदको सजाय सुनाएको थियो ।
जिल्लाको फैसलालाई तत्कालीन पुनरावेदन अदालत पाटनले सदर गरेको थियो । त्यसविरुद्ध सर्वोच्च गएका कोइरालालाई प्रधानन्यायाधीश जबरा र न्यायाधीश तेजबहादुर केसीको इजलासले २०७७ असार १५ मा साढे ८ वर्ष कैदमा बसे पुग्ने फैसला गरेसँगै जन्मकैदको सजाय घटेको थियो ।
सर्वोच्चको उक्त फैसला विरुद्ध महान्यायाधिवक्ता कार्यालयले पुनरावलोकनको निवेदन दिएको थियो ।
त्यही निवेदन माथि फैसला गर्दै कामु प्रधानन्यायाधीश दीपककुमार कार्की र न्यायाधीशद्वय टंक मोक्तान र कुमार चुडालको पूर्ण इजलासले बिहीबार कोइरालाको जन्मकैदको सजाय घटाउने यसअघिको फैसला उल्टाएको थियो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
