काठमाडौं । सिद्धार्थ बैंकको खुद नाफामा ३२.३१ प्रतिशतले वृद्धि भएको छ । बैंकले आइतबार सार्वजनिक गरेको गत आर्थिक वर्ष २०७७/७८ को चौथो त्रैमासको अपरिष्कृत वित्तीय विवरण अनुसार २ अर्ब ८३ करोड ६१ लाख रुपैयाँ खुद मुनाफा कमाएको छ ।
यो अघिल्लो आव २०७६/७७ को सोही अवधिको तुलनामा ६९ करोडले बढी हो । बैंकले अघिल्लो आवको असार मसान्तसम्म २ अर्ब १४ करोड ३६ लाख रुपैयाँ नाफा कमाएको थियो ।
समीक्षा अवधिमा खुद ब्याज आम्दानीमा झिनो गिरावट भए पनि संचालन नाफा बढेसँगै बैंकको खुद नाफा बढेको हो । बैंकको खुद ब्याज आम्दानी ०.६२ प्रतिशतले घटेर ५ अर्ब ५३ करोडमा सीमित भएको छ । यस्तै, बैंकको संचालन नाफा ३०.५७ प्रतिशतले बढेर ४ अर्ब १३ करोड रुपैयाँ पुगेको छ ।
१० अर्ब ९६ करोड चुक्ता पूँजी रहेको बैंकको जगेडा कोषमा ९ अर्ब ३० करोड रुपैयाँ संचित छ । यस अवधिमा बैंकको वितरण योग्य नाफा १ अर्ब २१ करोड ७६ लाख रुपैयाँ छ।
असार मसान्तसम्ममा बैंकले १ खर्ब ८० अर्ब निक्षेप संकलन गरी १ खर्ब ५८ अर्ब रुपैयाँ कर्जा लगानी गरेको छ। समीक्षा अवधिमा बैंकको निक्षेप संकलन २९.५९ प्रतिशत र कर्जा लगानी विस्तार २८.३० प्रतिशतले सुधार भएको हो।
खुद नाफा बढेसँगै बैंकको प्रतिसेयर आम्दानी २१.९० रुपैयाँबाट बढेर २५.८७ रुपैयाँ पुगेको छ । समीक्षा अवधिमा बैंकको प्रतिसेयर नेटवर्थ १८४.८६ रुपैयाँ, मूल्य आम्दानी अनुपात १९.४८ गुणा, सीसीडी अनुपात ७७.४२ प्रतिशत, आधारदर ७.१६ प्रतिशत र स्प्रेडदर ३.७ प्रतिशत र खराब कर्जा १.१६ प्रतिशत रहेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
