काठमाडौं । नेपाल राष्ट्र बैंकले सहुलियतपूर्ण कर्जा दुरुपयोग गरेको भन्दै १५ वित्तीय संस्थाका प्रमुख कार्यकारी अधिकृत (सीईओ) लाई कारबाही गरेको छ ।
राष्ट्र बैंकले पुनर्कर्जा, व्यावसायिक निरन्तरता कर्जा, सहुलियतपूर्ण कर्जा सदुपयोग नगरेको भन्दै ७ विकास बैंक र ८ फाइनान्स कम्पनीका सीईओलाई कारबाही स्वरुप सचेत गराएको हो ।
कोभिड १९ को समयमा अर्थतन्त्र पुनर्उत्थान गर्ने भन्दै राष्ट्र बैंकले पुनर्कर्जा र सरकारले सहुलियतपूर्ण कर्जा सुविधा दिएका थिए । उक्त कर्जाको दुरुपयोग भएको भन्दै प्रश्न उठेपछि सरकारले स्वतन्त्र परामर्शदाता नियुक्त गरी छानबिन अगाडि बढाएको थियो । सोही परामर्शदाताले बुझाएको प्रतिवेदनका आधारमा ७ विकास बैंक र ८ फाइनान्सका सीईओलाई कारबाही स्वरुप सचेत गराइएको राष्ट्र बैंकले जनाएको छ ।
राष्ट्र बैंकका अनुसार लुम्बिनी, महालक्ष्मी, कामना सेवा, मुक्तिनाथ, सालपा, गरिमा र सप्तकोशी डेभलपमेन्ट बैंकका सीईओहरूलाई सचेत गराइएको छ ।
त्यस्तै, फाइनान्सतर्फ समृद्धि फाइनान्स, पोखरा फाइनान्स, प्रोग्रेसिभ फाइनान्स, आईसीएफसी फाइनान्स, जानकी फाइनान्स, सेन्ट्रल फाइनान्स, रिलायन्स फाइनान्स र गुडविल फाइनान्सका सीईओहरूलाई सचेत गराइएको राष्ट्र बैंकले जनाएको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
