तस्बिर सार्वजनिक गर्दै चीनले भन्यो: छोछेन खोलामा हिमनदी फुट्न सक्ने जोखिम कायमै

एजेन्सी । नेपालको छोछेन खोलाको ‘इम्प्याक्ट क्रेटर’ (ठक्करबाट बनेको खाल्डो) वरपरका हिमनदीहरू अझै पनि थप भत्कन सक्ने अवस्थामा रहेको र यसले ठूलो सम्भावित खतरा निम्त्याउन सक्ने चीनको जलस्रोत मन्त्रालयलाई उद्धृत गर्दै सीसीटीभी न्यूजले मंगलबार रिपोर्ट गरेको छ ।

मन्त्रालयले दक्षिणपश्चिम चीनको तिब्बत स्वायत्त क्षेत्रको केरुङ काउन्टीमा आएको लेदोसहितको बाढी विपद्सँग सम्बन्धित पूर्ण–श्रृंखला जोखिमहरूको निरन्तर परामर्श र क्रमिक मूल्यांकन गरिरहेको सीसीटीभीले उल्लेख गरेको छ ।

रिमोट–सेन्सिङ इमेजरीको हालैको तुलनात्मक विश्लेषण अनुसार, केरुङ साङ्पो नदी बेसिनमा यसअघि पहिचान गरिएका १४ वटा हिमतालहरूको पानीको सतहको क्षेत्रफलमा कुनै उल्लेखनीय परिवर्तन देखिएको छैन र समग्रमा ती तुलनात्मक रूपमा स्थिर रहेका छन् ।

मंगलबार बिहान ८ बजे खिचिएको ड्रोन इमेजरीका आधारमा नेपालको छोछेन खोलाको ‘इम्प्याक्ट क्रेटर’ मा जम्मा भएको पानी धेरै हदसम्म रित्तिएको छ र तल्लो तटीय नदी सामान्य रूपमा बगिरहेको छ । तर, रिपोर्टका अनुसार उक्त ‘इम्प्याक्ट क्रेटर’ वरपर हिमनदी भत्किने जोखिम अझै कायमै रहेको छ ।