मौद्रिक नीति समीक्षा लागू गर्न राष्ट्र बैंकले जारी गर्यो सर्कुलर, यस्ता छन् नयाँ व्यवस्था

काठमाडौं । नेपाल राष्ट्र बैंकले मौद्रिक नीतिको अर्धवार्षिक समीक्षा मार्फत गरिएका व्यवस्थाहरू कार्यान्वयन गर्न सर्कुलर जारी गरेको छ ।

राष्ट्र बैंकले सोमबार वाणिज्य बैंक, विकास बैंक र फाइनान्स कम्पनीहरूलाई मौद्रिक नीति समीक्षा लागू गर्न सर्कुलर मार्फत निर्देशन दिएको हो ।

राष्ट्र बैंकले असल कर्जाको प्रोभिजनदर ०.१ प्रतिशत बिन्दुले घटाएको छ। यसअघि असल कर्जाम बैंक तथा वित्तीय संस्थाले १.१ प्रतिशत प्रोभिजन गर्दै आएकोमा अब १ प्रतिशत प्रोभिजन गरे पुग्ने व्यवस्था गरेको छ ।

त्यस्तै, १ वर्ष बढीभन्दा बढी ग्रेस अवधि भएका ऊर्जा लगायतका पूर्वाधार निर्माणसँग सम्बन्धित परियोजनाहरूमा प्रवाहित असल कर्जाहरूको ग्रेस अवधिसम्म प्रत्येक वर्ष समानुपातिक रुपमा कर्जा नोक्सानी व्यवस्था गरी अन्तिम वर्ष १ प्रतिशत सामान्य कर्जा नोक्सानी व्यवस्था कायम गर्न सकिने व्यवस्था गरेको छ ।

उदाहरणको लागि, कुनै कर्जाको ग्रेस अवधि ४ वर्ष छ भने त्यस्तो कर्जाको लागि पहिलो वर्ष ०.२५ प्रतिशत, दोस्रो वर्ष ०.५० प्रतिशत , तेस्रो वर्ष ०.७५ प्रतिशत र चौथो वर्षदेखि १.०० प्रतिशत साधारण कर्जा नोक्सानी व्यवस्था कायम गर्नुपर्नेछ ।

त्यसैगरी, राष्ट्र बैंकले विद्युतीय सवारीसाधनको लोन टु भ्यालु रेसियो ८० प्रतिशतबाट ६० प्रतिशतमा झारेको छ । कम्बस्चन गाडीको हकमा भने लोन टु भ्यालु रेसियो ५० प्रतिशतबाट बढाएर ६० प्रतिशत पुर्याएको छ ।

यससँगै अब सबै प्रकारका सवारी साधन खरिद गर्दा न्यूनतम ४० प्रतिशत डाउन पेमेन्ट गर्नुपर्नेछ । यसअघि विद्युतीय सवारी खरिदमा २० प्रतिशत र कम्बस्चन गाडी खरिदमा ५० प्रतिशत डाउन पेमेन्ट गर्नुपर्ने व्यवस्था थियो ।