नेपाली आकाश हवाई उडानका लागि सुरक्षित छ : मन्त्री श्रेष्ठ

काठमाडाैं । संस्कृति, पर्यटन तथा नागरिक उड्डयनमन्त्री जीवनराम श्रेष्ठले नेपाली आकाश हवाई उडानका लागि सुरक्षित रहेको बताएका छन् ।

नागरिक उड्डयन दिवसका अवसरमा यहाँ आयोजित एक कार्यक्रममा उनले त्यो कुरा बताए । अन्तर्राष्ट्रिय निकायले हवाई सुरक्षाका विषयमा प्रश्न उठाउनुपर्ने अवस्था नरहेको उनको भनाइ छ । 

प्राधिकरणले अझ सुरक्षालाई व्यवस्थित बनाउने काम गरिरहेको उनले जानकारी दिए । नागरिक उड्डयन प्राधिकरणले हवाई सुरक्षाका विषयमा जिम्मेवारीपूर्वक काम गरिरहेको चर्चा गर्दै मन्त्री श्रेष्ठले नेपालको हवाई उडान आइकाओको कालोसूचीबाट हट्ने अवस्थामा पुगेको दावी गरे । 

हवाई सुरक्षा नीतिका विषयमा सरकारले आफ्नो नीति स्पष्ट बनाएको बताउँदै उनले आइकाओले नेपालको नीति, प्राधिकरणले हवाई सुरक्षामा गरेका कामका आधारमा चाँडै कालोसूचीबाट हट्ने विश्वास पनि व्यक्त गरे । 

नेपाल वायुसेवा निगमको नेतृत्वले क्षमता विकास गर्न नसकेको उनको टिप्पणी छ । सरकारले ठूलो लगानी गरेको वायुसेवा निगममा अयोग्य नेतृत्वका कारण जनताले सेवा लिनबाट वञ्चित हुनेगरेको उनले गुनासो गरे ।  रासस