काठमाडौं । चीनसँगको मुख्य व्यापारिक नाका तातोपानी पुग्ने सडक २६ दिनपछि संचालनमा आएको छ । गत असोज १० देखि १२ गतेसम्म आएको बाढीपहिरोका कारण अवरुद्ध अरनिको राजमार्ग बिहीबार रातिदेखि संचालनमा आएको हो ।
पहिरोले बगाएको सडक मर्मत गरी तातोपानी नाका पूर्ण रूपमा सञ्चालनमा ल्याइएको तातोपानी भन्सार कार्यालयका सूचना अधिकारी सूर्यप्रसाद काफ्लेले जानकारी दिए ।
बाढीले भोटेकोशीको बेलिब्रिज र लिपिङ खोलाको पक्की पुल बगाएको थियो भने केही ठाउँमा सडक बगाएकाे थियाे ।
अहिले भोटेकोशी नदीमा डाभइभर्सन निर्माण गरी यातायात सुचारु गरिएको हो । त्यस्तै, लिपिङ खोलामा पहिरोले बगाएको ठाउँमा ढुंगामाटो भरेर सडक निर्माण गरी सवारी आवतजावतको व्यवस्था मिलाइएको उनले बताए ।
सडक सुचारु भएपछि दशैं अघिदेखि रोकिएका मालबाहक कन्टेनर धमाधम भन्सार यार्डमा आउन थालेका छन्। सडक अबरुद्ध हुँदा व्यवसायीले दशैंलाई लक्षित गर्दै ल्याएका सवारीसाधन, लत्ताकपडा लगायत सामान चीनतर्फ रोकिएका थिए । यसअघि फलफूल लगायत कुहिने सामान बोकाएरै ल्याइएको थियो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
