काठमाडौं । =प्रधानमन्त्री केपी शर्मा ओलीले गैरआवासीय नेपाली संघ (एनआरएनए) को वैधानिकताको विषयमा उठाइएका विवादलाई निराधार भन्दै वर्तमान कार्यसमिति नै वैधानिक भएको बताएका छन्।
प्रधानमन्त्री ओलीले गैरआवासीय नेपालीहरूको संस्थाको वैधानिकता बारेमा पटकपटक विवाद गर्न उचित नहुने जनाउँदै संस्थाको भविष्यका लागि एकता र समन्वयको आवश्यकता रहेको बताए।
बुधबार बालुवाटारमा प्रधानमन्त्री ओली र गैरआवासीय नेपाली संघका अध्यक्ष डा. बद्री केसीबीच भएको भेटमा ओलीले सर्वोच्च अदालतको दोस्रो फैसलाले निर्वाचित कार्यसमितिलाई वैधानिकता दिइसकेको उल्लेख गरे। उनले भने, 'सर्वोच्च अदालतको फैसलाले यो संस्थाको वैधानिकता प्रमाणित गरेको छ र त्यसको आधारमा मात्रै सरकार वर्तमान कार्यसमितिलाई मान्यता दिन सक्षम भएको हो।'
प्रधानमन्त्री ओलीले थपे, 'सरकारले सर्वोच्च अदालतको अन्तिम निर्णयको सम्मान गर्दै एनआरएनएको वार्षिक साधारणसभामा पनि भाग लिएको हो। पटकपटक वैधानिक प्रश्न उठाउन आवश्यक छैन। यो सबै प्रक्रियासँगै संस्थाको वैधानिकता निर्विवाद छ। संस्थाको विवादमा समय नष्ट गर्नु उपयुक्त होइन।'
संस्थाको विवादमा अल्झेर बस्दा राज्य र गैरआवासीय नेपाली समुदाय दुवैकाे भलाे नहुने जिकिर गरे। उनले भने, 'संस्थाको विवादमा अल्झेर बस्दा न त राज्यको लाभ हुन्छ, न त गैरआवासीय नेपाली समुदायको। यसले दुवै पक्षलाई ठूलो अवसर गुमाउने अवस्थामा पुर्याउँछ।' सबैले संस्थाको विवादमा भन्दा देशको समृद्धिका लागि गैरआवासीय नेपालीहरूलाई एउटा साझा मञ्चमा ल्याएर सकारात्मक काम गर्नुपर्ने आवश्यकता उनले रहेकाे बताए।
ओलीले गैरआवासीय नेपालीहरूको ठूलो सम्भावनाको पक्षमा आवाज उठाउँदै भने, 'गैरआवासीय नेपाली समुदायको योगदानलाई सरकारले कदर गर्दै आएको छ र आगामी दिनमा अझ बढी सहयोग र समन्वयको लागि पहल गरिनेछ।' उनले नेपाली प्रवासीहरुलाई नेपालको समृद्धि र विकासमा महत्वपूर्ण योगदान दिने अवसर दिइएकोमा विश्वास व्यक्त गरे।
प्रधानमन्त्री ओलीले गैरआवासीय नेपाली नागरिकताको कार्यान्वयनमा पनि सरकारले ठूलो ध्यान दिएको र यसका लागि आवश्यक कानूनी तयारी पनि तीव्र गरिएको जानकारी दिए। उनले भने, 'हामी हिँउदे अधिवेशनमा गैरआवासीय नेपाली नागरिकता सम्बन्धी विधेयक संसदमा पेस गर्ने तयारीमा छौं। यसले गैरआवासीय नेपालीहरुको अधिकार र योगदानलाई थप मान्यता दिनेछ।'
उक्त भेटमा गैरआवासीय नेपाली संघका अध्यक्ष डा. केसीले पनि संस्थाका पछिल्ला गतिविधिहरू र गैरआवासीय नेपाली नागरिकता सम्बन्धी समस्या र चुनौतीहरू समेत प्रधानमन्त्री ओलीको ध्यानाकर्षण गराएका थिए। डा. केसीले गैरआवासीय नेपालीहरूलाई नेपालको विकास प्रक्रियामा थप सहभागी गराउने, उनीहरूको समस्यालाई समाधान गर्ने र संस्थाको एकतालाई बलियो बनाउने दिशामा सरकारसँग सहकार्य गर्न तयार रहेको बताए।
यसैबीच, प्रधानमन्त्री ओलीले गैरआवासीय नेपाली संघसँग कडा समन्वय र सहकार्य गर्न सरकारको तत्परता पनि व्यक्त गरे।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
