काठमाडौं । सरकारले पूर्वराजा ज्ञानेन्द्र शाहको सेवा–सुविधा खोस्ने र राहदानी जफत गर्ने प्रक्रिया अघि बढाएको छ।
शुक्रबार काठमाडौंको तीनकुनेमा भएको हिंसात्मक आन्दोलनमा उनको संलग्नता रहेको निष्कर्षपछि सरकारले यस्तो निर्णय लिएको हो। तीनकुनेमा भएको झडपमा दुई जनाको मृत्यु भएको थियो भने १०५ जना घाइते भएका थिए। आन्दोलनकारीहरूले १४ स्थानमा आगजनीसमेत गरेका थिए, जसको छानबिन गर्न सरकारले समिति गठन गर्ने निर्णय गरेको छ।
उच्च सरकारी स्रोतका अनुसार, उक्त हिंसात्मक आन्दोलनको निर्देशन पूर्वराजाले नै दिएका थिए भन्ने प्रमाणहरू फेला परेपछि सरकारले उनको राहदानी रद्द गर्ने प्रक्रिया अघि बढाएको हो। स्रोतका अनुसार, छानबिन अघि बढेपछि पूर्वराजा शाह विदेश पलायन हुन सक्ने सम्भावना रहेकाले सरकार तुरुन्तै कदम चाल्न लागेको हो।
शुक्रबार राति बसेको मन्त्रिपरिषद् बैठकले हिंसात्मक घटनाका दोषीहरूलाई कडा कारबाही गर्ने निर्णय गरेको छ। बैठकमा पूर्वराजा शाहले राजतन्त्र पुनःस्थापनाका लागि आयोजित आन्दोलनलाई प्रत्यक्ष रूपमा निर्देशन दिएको निष्कर्ष निकालिएको छ। सरकारी निकायहरूका अनुसार, शुक्रबारको झडपका लागि फिल्ड कमान्डर दुर्गा प्रसाईं भए पनि आन्दोलनको योजना निर्मल निवासबाटै तय गरिएको थियो। प्रसाईंले सुरक्षाकर्मीमाथि गाडी आक्रमण गरेपछि भिड उत्तेजित भएको र त्यसपछि ढुंगामुढा तथा आगजनी सुरु भएको सरकारी निष्कर्ष छ।
पूर्वराजा शाह वा उनका समर्थकहरूले यसबारे कुनै आधिकारिक प्रतिक्रिया दिएका छैनन्। तर, राजावादी समूहले सरकारको यो कदमलाई राजनीतिक प्रतिशोधको रूपमा व्याख्या गरेको छ। सरकारले हिंसात्मक आन्दोलनलाई संगठित अपराधको रूपमा लिएको छ र दोषी जोसुकै भए पनि कानुनी कारबाही अघि बढाइने बताएको छ। अब सरकारका आगामी कदमबारे चासो बढेको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
