काठमाडौं । नेपाली कांग्रेसका सभापति शेरबहादुर देउवाले वर्तमान सरकार शान्ति सम्झौताका बाँकी काम पूरा गर्न सक्रिय रूपमा अघि बढिरहेको बताएका छन्।
बिहीबार काठमाडौंमा आयोजित एक कार्यक्रममा सम्बोधन गर्दै सभापति देउवाले संक्रमणकालीन न्याय प्रक्रियालाई टुंगोमा पुर्याउन सरकारले हालै सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोग का पदाधिकारी नियुक्तिका लागि सिफारिस समिति गठन गरेको जानकारी दिए।
"अब छिट्टै यी आयोगहरूले पूर्णता पाउनेछन्," देउवाले दाबी गरे। उनले सशस्त्र द्वन्द्वका क्रममा भएका मानव अधिकार उल्लंघनका घटनाहरूको सत्यतथ्य छानबिन गर्दै पीडितहरूलाई न्याय दिन आयोगहरू प्रतिबद्ध रहने विश्वास व्यक्त गरे।
सभापति देउवाले वर्तमान सरकार र राजनीतिक दलहरू शान्ति प्रक्रियालाई निष्कर्षमा पुर्याउने विषयमा एकमत रहेको उल्लेख गर्दै, पीडितहरूको न्याय सुनिश्चित गर्न कुनै सम्झौता नहुने स्पष्ट पारे।
नेपालमा दशक लामो सशस्त्र द्वन्द्वपछि २०६३ मा भएको शान्ति सम्झौता कार्यान्वयनको क्रममा संक्रमणकालीन न्यायसम्बन्धी विषय अझै टुंगोमा पुग्न सकेको छैन। यसैबीच, सरकारको पछिल्लो कदमले शान्ति प्रक्रियालाई दिगो निष्कर्षमा पुर्याउने अपेक्षा गरिएको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
