काठमाडौं । नेपाली कांग्रेसका सांसद जीवन परियारले सिरहाको औरही गाउँपालिका-५ मा विष्णु महायज्ञ गर्ने नाममा त्यहाँ बसोबास गरिरहेका डोम समुदायका व्यक्तिहरूलाई उठिवास गरिएको आरोप लगाएका छन्।
प्रतिनिधि सभाको बिहीबारको बैठकमा बोल्दै सांसद परियारले गाउँपालिका अध्यक्ष शिवजी यादव र जनमत पार्टीका गाउँपालिका समिति अध्यक्ष दिलिप यादवसहितका व्यक्तिहरूको संलग्नतामा डोम समुदायलाई विस्थापित गरिएको बताए। उनले पीडित परिवारहरूलाई न्याय दिलाउन सरकारको ध्यानाकर्षण गराए।
‘औरही गाउँपालिका अध्यक्ष शिवजी यादव र जनमत पार्टीका गाउँपालिका अध्यक्ष दिलिप यादवसहितका व्यक्तिहरूले डोम समुदायका नागरिकहरूलाई उठिवास गरेको घटनाप्रति घोर भर्त्सना गर्दछु,’ उनले संसदमा भने।
उनले नेपालमा जातीय विभेदका घटना बढिरहेको र रङभेदसम्बन्धी आन्दोलनहरू भइरहेका भन्दै गम्भीर चिन्ता व्यक्त गरे। सांसद परियारले पीडित समुदायलाई संरक्षण प्रदान गर्न सरकारलाई तत्काल हस्तक्षेप गर्न आग्रह गरे।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
