काठमाडौं । चालु आर्थिक वर्षको पहिलो सात महिनामा वाणिज्य बैंकहरूले कुल ३६ अर्ब ६ करोड ८० लाख रुपैयाँ खुद नाफा कमाएका छन्। नेपाल राष्ट्र बैंकले सार्वजनिक गरेको तथ्यांकअनुसार, यो नाफा अघिल्लो आर्थिक वर्षको सोही अवधिको तुलनामा १.६२ प्रतिशतले बढी हो। गत वर्ष माघसम्म बैंकहरूले ३५ अर्ब ४९ करोड २४ लाख रुपैयाँ नाफा कमाएका थिए।
अर्थतन्त्रमा आएको संकुचनका कारण कर्जाको माग कम हुँदा बैंकहरूको व्यवसाय अपेक्षाअनुसार विस्तार हुन सकेको छैन। चालु आवको ७ महिनामा बैंक तथा वित्तीय संस्थाहरूले जम्मा २ खर्ब ७२ अर्ब रुपैयाँ मात्र कर्जा लगानी गरेका छन्। साथै, ऋण असुलीमा सुधार नहुँदा खराब कर्जा बढेको र यसले नाफा प्रभावित पारेको बैंकहरूले बताएका छन्।
समग्र रूपमा ९ बैंकले नाफा बढाएका छन् भने ११ बैंकको नाफा घटेको छ। नेपाल बैंकले सबैभन्दा धेरै १५६.३१ प्रतिशतले नाफा बढाएको छ भने प्रभु बैंकले ९७.७८ प्रतिशत, ग्लोबल आइएमईले ४५.०१ प्रतिशत, नेपाल इन्भेष्टमेन्ट मेगाले ४१.२८ प्रतिशत र एनएमबी बैंकले ४१.२८ प्रतिशत नाफा वृद्धि गरेका छन्। अर्कोतर्फ, एनआइसी एशिया बैंकको नाफा सबैभन्दा धेरै ७८.३१ प्रतिशतले घटेको छ। राष्ट्रिय वाणिज्य बैंकको नाफा ५३.८३ प्रतिशत, कृषि विकास बैंकको ४९.१६ प्रतिशत, सिद्धार्थ बैंकको ३९.७ प्रतिशत र कुमारी बैंकको ३४.१६ प्रतिशतले घटेको छ।
नाफाको हिसाबले नबिल बैंक सबैभन्दा अगाडि रहेको छ। माघसम्म नबिल बैंकले ४ अर्ब १ करोड रुपैयाँ खुद नाफा कमाएको छ, जुन अघिल्लो वर्षको तुलनामा ०.६२ प्रतिशतले बढी हो। ग्लोबल आइएमई बैंकले ३ अर्ब ८९ करोड रुपैयाँ नाफा कमाएर दोस्रो स्थान हासिल गरेको छ। नेपाल इन्भेष्टमेन्ट बैंकले २ अर्ब ४३ करोड रुपैयाँ नाफा कमाएको छ भने एभरेष्ट बैंक, नेपाल बैंक, एनएमबी बैंक, र प्राइम बैंकले पनि २ अर्बभन्दा बढी नाफा आर्जन गरेका छन्।
तर, सबै बैंकहरूको नाफा उत्साहजनक छैन। माछापुच्छ्रे बैंक, सिटिजन्स बैंक, सिद्धार्थ बैंक, कृषि विकास बैंक, कुमारी बैंक, र एनआइसी एशिया बैंकको नाफा १ अर्बभन्दा कम रहेको छ। राष्ट्र बैंकले मौद्रिक नीतिमार्फत सहुलियत प्रदान गरे पनि खराब कर्जा बढ्दा बैंकहरूको नाफा अपेक्षित रूपमा बढ्न सकेको छैन। बैंकहरू अझै पनि कर्जाको माग बढ्ने र ऋण असुलीमा सुधार आउने आशामा छन्, जसले आगामी महिनाहरूमा नाफामा सकारात्मक प्रभाव पार्न सक्छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
