काठमाडौँ । प्रधानमन्त्री केपी शर्मा ओलीले संघीय लोकतान्त्रिक गणतन्त्रलाई कमजोर पार्ने कुनै पनि प्रयास सफल नहुने स्पष्ट पारेका छन्।
सुदूरपश्चिम प्रदेशसभा बैठकमा विशेष सम्बोधन गर्दै उनले वर्तमान संविधान कुनै व्यक्तिले दिएको नभई जनताबाट निर्वाचित संविधानसभाले निर्माण गरेको उल्लेख गर्दै यसको रक्षा गर्नु सबैको दायित्व भएको बताए। उनले जनताको बलिदानपूर्ण सङ्घर्षबाट प्राप्त यो व्यवस्थालाई कमजोर बनाउने कुनै पनि कदम अस्वीकार्य हुने चेतावनी दिए।
प्रधानमन्त्री ओलीले पूर्वराजा ज्ञानेन्द्र शाहद्वारा प्रजातन्त्र दिवसका अवसरमा जारी गरिएको अभिव्यक्तिप्रति आश्चर्य व्यक्त गर्दै मुलुकलाई अस्थिरतातर्फ धकेल्ने प्रयास भइरहेको बताए। उनले कुनै कुर्सीमा बसाल्दैमा कोही राजा नबन्ने उल्लेख गर्दै वर्तमान राष्ट्रपतिलाई जनताले निर्वाचित गरेको स्मरण गराए। गणतन्त्रको रक्षा गर्न सबै राजनीतिक दलहरू एकजुट रहेको बताउँदै उनले अस्थिरता निम्त्याउने कुनै पनि खेललाई सफल हुन नदिइने दाबी गरे।
सरकार अहिले दुई ठूला दलहरूको सहमतिमा बनेको र सत्ता हस्तान्तरण पनि सहमतिअनुसार नै गरिने प्रधानमन्त्री ओलीले बताए। उनले मुलुकको स्थायित्व र समृद्धिका लागि लोकतान्त्रिक विधि र प्रक्रियालाई अघि बढाउनु पर्नेमा जोड दिए।
पूर्वराजा शाहको अभिव्यक्तिपछि राजसंस्थाको पक्षमा भइरहेको गतिविधिले गणतन्त्रको भविष्यबारे नयाँ बहस सिर्जना गरेको छ भने सरकार र प्रमुख राजनीतिक दलहरू यसको रक्षा गर्न सचेत बनेका छन्।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
