आइपीओ ल्याएको क्रेष्ट माइक्रोमा हिमालयन रिदेखि कन्स्ट्रक्सनसम्मको लगानी, कसको कति ?

काठमाडौ ।  क्रेष्ट माइक्रो लाइफ इन्स्योरेन्स लिमिटेडले आजदेखि प्राथमिक साधारण सेयर (आईपीओ) निष्कासन तथा बिक्री खुला गरेको छ।

कम्पनीले दोस्रो चरणमा सर्वसाधारणका लागि आईपीओ ल्याएको हो, जसअन्तर्गत प्रतिकित्ता १०० रुपैयाँ दरमा १८ लाख ४५ हजार कित्ता सेयर बिक्री गर्न लागेको छ। यस आईपीओमा लगानीकर्ताले न्यूनतम १० कित्तादेखि अधिकतम १० हजार कित्तासम्म आवेदन दिन सक्नेछन्। आवेदन दिने अवधि फागुन २६ गतेसम्म रहेको छ, तर सो अवधिमा सम्पूर्ण सेयर बिक्री नभएमा चैत ७ गतेसम्म आवेदन खुला रहनेछ। लगानीकर्ताहरूले नेपाल धितोपत्र बोर्डबाट सी-आस्वा अनुमति प्राप्त बैंक तथा वित्तीय संस्था, तिनका शाखा कार्यालयहरू वा मेरोसेयरमार्फत अनलाइन आवेदन दिन सक्नेछन्। कम्पनीको आईपीओ निष्कासन तथा बिक्री प्रबन्धक एनआइएमबीएस क्यापिटल लिमिटेड रहेको छ।

क्रेष्ट माइक्रो लाइफ इन्स्योरेन्स २०७९ पुस १३ गते नेपाल सरकार, कम्पनी रजिष्ट्रारको कार्यालयमा पब्लिक लिमिटेडका रूपमा दर्ता भएको हो। नेपाल बीमा प्राधिकरणबाट २०७९ चैत २८ गते लघु बीमा कारोबार गर्न स्वीकृति प्राप्त गरेको कम्पनीले २०८० जेठ २ गतेदेखि औपचारिक रूपमा सञ्चालन सुरू गरेको हो। कम्पनीको रजिस्टर्ड कार्यालय सुर्खेतको वीरेन्द्रनगर-६ मा रहेको छ भने प्रादेशिक कार्यालय ललितपुरको रमेश कम्प्लेक्समा अवस्थित छ। हाल देशभर सातै प्रदेशमा २३ वटा शाखा तथा उपशाखा सञ्चालनमा छन्। कम्पनीले समयसापेक्ष नयाँ लघु जीवन बीमा योजना तथा सेवाहरू विकास गरी व्यापार विस्तार गर्ने योजना बनाएको छ।

कम्पनीको अधिकृत पूँजी १ अर्ब रुपैयाँ रहेको छ भने हाल जारी पूँजी ७५ करोड ५० लाख रुपैयाँ रहेको छ। हाल ५२ करोड ५० लाख रुपैयाँ चुक्ता पूँजी रहेको कम्पनीले आईपीओ जारी गरी थप २२ करोड ५० लाख रुपैयाँ जुटाउने योजना बनाएको छ, जसपछि चुक्ता पूँजी ७५ करोड रुपैयाँ पुग्नेछ। कम्पनीमा संस्थापक सेयरधनीको स्वामित्व ७० प्रतिशत रहेको छ भने सर्वसाधारणको हिस्सा ३० प्रतिशत हुनेछ। चालु आर्थिक वर्षको पुस मसान्तसम्म कम्पनीले ४० लाख १७ हजार रुपैयाँ खुद नाफा कमाएको छ भने ७ करोड ६० लाख रुपैयाँ प्रिमियम संकलन गरेको छ।

कम्पनीले सार्वजनिक गरेको आह्वानपत्रअनुसार चालु आर्थिक वर्षमा ५ करोड ८० लाख रुपैयाँ, २०८२/८३ मा ११ करोड ८५ लाख रुपैयाँ, र २०८३/८४ मा १५ करोड ४८ लाख रुपैयाँ खुद नाफा आर्जन गर्ने लक्ष्य राखेको छ। त्यस्तै, संचित मुनाफा चालु आवमा २ करोड ६९ लाख, २०८२/८३ मा ९ करोड ९४ लाख, र २०८३/८४ मा १९ करोड ६३ लाख रुपैयाँ पुग्ने प्रक्षेपण गरिएको छ। प्रतिसेयर आम्दानी चालु आवमा ७.७४ रुपैयाँ, आगामी आवमा १५.८१ रुपैयाँ, र आव २०८३/८४ मा २०.६५ रुपैयाँ पुग्ने अनुमान गरिएको छ। प्रतिसेयर नेटवर्थ चालु आवमा १०९.३१ रुपैयाँ, आगामी वर्ष १२५.१८ रुपैयाँ, र आव २०८३/८४ मा १४५.९३ रुपैयाँ पुग्ने अनुमान गरिएको छ।

आइपीओ निष्काशनको लागि गराइएको रेटिङमा इक्रा नेपालले कम्पनीलाई ‘इक्रा एनपी इस्युअर रेटिङ डबल बी’ प्रदान गरेको छ, जसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्छ। आईपीओबाट प्राप्त हुने रकम कम्पनी ऐन, बीमा ऐन तथा अन्य प्रचलित कानुनअनुसार कम्पनीको व्यवसायिक प्रयोजनमा उपयोग गरिनेछ। साथै, नेपाल बीमा प्राधिकरणबाट जारी नयाँ लगानी निर्देशिकाअनुसार पूर्वाधार तथा राष्ट्रिय प्राथमिकताका क्षेत्रमा लगानी गर्न पहल गरिने कम्पनीले जनाएको छ।

कम्पनीका अनुसार आईपीओबाट प्राप्त हुने २२ करोड ५० लाख रुपैयाँमध्ये ४ करोड ५० लाख रुपैयाँ नेपाल सरकारको जमानत प्राप्त ऋणपत्र तथा बचतपत्रमा, ९ करोड रुपैयाँ मुद्दती निक्षेपमा, ५ करोड ६२ लाख ५० हजार रुपैयाँ बैंक तथा वित्तीय संस्थाले जारी गर्ने ऋणपत्र तथा डिबेञ्चरमा लगानी गरिनेछ। त्यस्तै, ६७ लाख ५० हजार रुपैयाँ सूचीकृत कम्पनीहरूको बण्ड, डिबेञ्चर, ऋणपत्रमा, १ करोड २५ लाख ५० हजार रुपैयाँ नागरिक लगानी कोष तथा म्युचुअल फण्डमा, र १ करोड ५७ लाख ५० हजार रुपैयाँ सूचीकृत कम्पनीको साधारण सेयरमा लगानी गर्ने योजना बनाइएको छ।

कम्पनीको कुल चुक्त पूँजीको ७० प्रतिशत हिस्सा संस्थापक सेयरधनीको रहेको छ। क्रेष्ट माइक्रोमा हिमालयन रि इन्स्योरेन्स, विभिन्न इन्भेष्टमेन्ट कम्पनी तथा व्यवसायी/व्यक्तिहरू प्रमोटर सेयर होल्डरका रूपमा रहेका छन्। कम्पनीमा मुख्यगरी १७ जना प्रमोटर सेयर होल्डर रहेका छन्। सबैभन्दा ठूलो सेयरधनी हिमालयन रि इन्स्योरेन्स हो, जसले ११ करोड २५ लाख रुपैयाँ बराबरको ११ लाख २५ हजार कित्ता सेयर लगानी गरेको छ। त्यस्तै, मेट्रो क्यापिटलको ८ करोड ७२ लाख रुपैयाँ बराबरको ८ लाख ७२ हजार कित्ता सेयर स्वामित्व छ। किशनलाल दुगड र केआरएस इन्भेष्टमेन्टको समान ३ करोड ५० लाख रुपैयाँ बराबरको ३ लाख ५० हजार कित्ता सेयर छ।

त्यस्तै, श्रद्धा अग्रवालको २ करोड २७ लाख, संगीतादेवी मोरको २ करोड ८ लाख, अनुपम राठीको १ करोड ७५ लाख, सुमन मोरको १ करोड ५२ लाख, संजय गोल्छा, समृद्धि एण्ड कम्पनी, र वैभव एण्ड कम्प्नीको समान १ करोड २५ लाख रुपैयाँ सेयर लगानी छ। आरएच इन्भेष्टमेन्ट, इफिसियन्ट हाउजिङ, आरएमसी कन्स्ट्रक्सन, र शोभाकर न्यौपानेले समान १ करोड रुपैयाँ लगानी गरेका छन्। आईपीओ बाँडफाँटपछि सर्वसाधारणको २२ करोड ५० लाख रुपैयाँ लगानी रहनेछ।

एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।