काठमाडौं। काठमाडौंको सुकेधारामा निर्मित फ्रान्सेली ब्राण्डको पहिलो पाँचतारे होटल मर्क्योर सञ्चालनमा आएको छ।
बुधबार प्रधानमन्त्री केपी शर्मा ओलीले उक्त होटलको उद्घाटन गरेका हुन् । एबी होल्डिङले ३ अर्ब रुपैयाँ लगानीमा उक्त होटल सञ्चालनमा ल्याएको हो ।
होटेल व्यवसायका क्षेत्रमा विश्वव्यापी सञ्जाल बनाएको अक्योर कम्पनी मातहतमा नेपालमा पहिलोपटक मर्क्योर होटेल सञ्चालामा आएको हो । एसिया, युरोप, अफ्रिका एवं मध्यपूर्वका १०० बढी देशका ५ हजार ४०० बढी होटलको व्यवस्थापन हेरिरहेको उक्त समूहले नेपालमा पहिलो पटक द मेट्रोपोलिटनमा मर्क्योर ब्राण्डमा होटल व्यवस्थापन सम्हालेको हो।
प्रधानमन्त्री ओलीले फ्रान्सेली पर्यटकलाई नेपाल भ्रमण गराउन उक्त होटेलले योगदान गर्ने विश्वास व्यक्त गरे । उनले होटेल व्यवसायमा मर्क्योरले नयाँपन दिँदै यस व्यवसायलाई प्रोत्साहन पुग्ने बताए ।
५ रोपनी क्षेत्रफलमा फैलिएको ११ तले होटलमा १०४ वटा कोठा छन्। होटलमा नेपाली, इण्डियन, चाइनिज रेस्टुराँ, लबी बार, स्वीमिङ पुलसँगै बैंक्वेट हल समेत छ । होटलमा कार्यक्रम र बैंठकका लागि पर्याप्त स्वीट हलसमेत उपलब्ध छ। यस्तै आधुनिक जिम, स्टीम र सौना, वेलनेस सेन्टरसमेत रहेको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
