काठमाडौं । नेकपा (एमाले) निकट राष्ट्रिय युवा संघ नेपाल र दुर्गा प्रसाईंको नेतृत्वमा रहेको राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालले आज काठमाडौंमा छुट्टाछुट्टै कार्यक्रम गर्ने भएपछि सुरक्षा सतर्कता बढाइएको छ ।
एक अर्का विरोधी मानिएका यी दुबै समूहको प्रदर्शनले तनाव बढाउने सम्भावना सुरक्षा निकायले आकलन गरेर राजधानीको सुरक्षा मजबुत बनाएको हो ।
दुबै समूहलाई एक ठाउँमा जम्मा हुन नदिन अलग–अलग ठाउँ तोकिएको छ ।
बिहानैदेखि नेपाल प्रहरी र सशस्त्र प्रहरी बलले नाकाहरूमा कुकुरसहित सुरक्षा जाँचमा कडाइ गरेको छ ।
ठूलो संख्यामा प्रहरी सडकमा उतारिएको छ । पहिलो घेरामा नेपाल प्रहरी र दोस्रो सुरक्षा घेरामा सशस्त्र प्रहरी तैनाथ छ । ‘ब्याकअप’मा नेपाली सेना रहेको छ ।
प्रदर्शनकारी बसेका स्थानमा पनि सादा पोशाकसहित सुरक्षाकर्मी खटाइएको छ ।
एकअर्का विरुद्ध आक्रामक देखिएको प्रसाईं र युवा संघबीच प्रदर्शन अघि नै तनावका केही घटना भइसकेको छ । प्रसाईं समूहको प्रदर्शनमा आएका महिलालाई सुतेको पार्टी प्यालेसबाट युवा संघले राति नै निकालेको भनेर विरोध भइरहेको छ । त्यस घटनापछि दुर्गा प्रसाईंले पनि आक्रोसित भएर कडा अभिव्यक्ति दिइका छन् ।
‘प्रदर्शन अघि नै मुठभेडमा जान खोजेको जस्तो देखियो,’ एक सुरक्षा अधिकारीले भने, ‘यसले तनावको सम्भावनालाई झन बढाएको छ । तनाव हुन नदिने गरि हाम्रा तयारी छ । सुरक्षा निकायले प्रदर्शन हुने ठाउँको ड्रोन क्यामेराबाट निगरानी गर्ने व्यवस्था मिलाएको छ । उच्छृंखल कृयाकलाप भएमा हरेक घटना क्यामेरामा कैद हुने गरि व्यवास्था मिलाएको एक अधिकारीले जानकारी दिए ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
