काठमाडौ । उपत्यका अपराध अनुसन्धान कार्यालयको प्रहरी टोलीले नेपाली नागरिकतासहित तिब्बती शरणार्थीलाई पक्राउ गरेको छ ।
काठमाडौँस्थित बौद्ध टुसाल क्याम्पमा बस्ने तिब्बती शरणर्थी २७ वर्षीया निमाल्हामो गुरुङ पक्राउ परेको प्रहरीले जनाएको छ ।
उपत्यका अपराध अनुसन्धान कार्यालयका अनुसार उनी तिब्बतबाट भारतको विहार, दिल्ली हँदै आई विगत दुई वर्षदेखि बौद्धको टुसाल क्याम्पमा बसेर उनले कृष्णबहादुर कटुवाललाई नागरिकता बनाउन सम्पर्क गरेको पाइएको छ।
यसैगरी कटुवालले गुरुङको नेपाली नागरिकता बनाइदिए वापत पाँच लाख लिएको प्रहरी अनुसन्धानबाट खुलेको उपत्यका अपराध अनुसन्धान कार्यालयले जनाएको छ ।
काठमाडौंका विभिन्न ठाँउमा बसोबास गर्ने तिब्बती शरणार्थीले सरकारी कार्यालयका कागजात, छाप तथा कर्मचारीको दस्तखतसमेत किर्ते गरी झुटो लिखत तथा नक्कली सिफारिस तयार गरेको खुलेको छ। साथै नक्कली बुबा खडा गरेर जिल्ला प्रशासन कार्यालय काठमाडौंबाट गुरुङले नेपाली नागरिकता लिएको प्रहरी अनुसन्धानबाट खुलेको उपत्यका अपराध अनुसन्धान कार्यालय काठमाडौँका सूचना अधिकारी तथा प्रहरी नायब उपरीक्षक रवीन्द्र रेग्मीले जानकारी दिए।
नेपाली नागरिकता प्रमाणपत्रसहित पक्राउ परेकी गुरुङलाई नागरिकता ऐन तथा लिखत सम्बन्धी कसुरमा कारवाहीका लागि जिल्ला प्रहरी परिसर टेकु पठाइएको उपत्यका अपराध अनुसन्धान कार्यालयले जनाएको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
