काठमाडौं । डिप्रोक्स लघुवित्त वित्तीय संस्थाको खुद नाफामा भारी गिरावट आएको छ । लघुवित्तले सोमबार सार्वजनिक गरेको चालु आर्थिक वर्षको पहिलो त्रैमासको अपरिष्कृत वित्तीय विवरण अनुसार खुद नाफा ४२.८९ प्रतिशतले घटेको छ ।
लघुवित्तले चालु आवको असोज मसान्तसम्ममा ९ करोड ९१ लाख रुपैयाँ कमाएको छ । यो गत वर्षको सोही अवधिको तुलनामा झन्डै ८ करोड कम हो । गत वर्ष असोजसम्म कम्पनीले १७ करोड ३५ लाख रुपैयाँ कमाएको थियो ।
खुद ब्याज आम्दानी, सञ्चालन नाफामा घट्दा र खराब कर्जा बढेपछि इम्पेयरमेन्ट चार्ज बढ्दा लघुवित्तको खुद नाफामा उच्च गिरावट आएको हो । समीक्षा अवधिमा लघुवित्तको खुद ब्याज आम्दानी ७.४३ प्रतिशत घटेर ३३ करोड २४ लाख रुपैयाँमा सीमित भएको छ । त्यस्तै, सञ्चालन मुनाफा ४३.१३ प्रतिशतले घटेर १४ करोड १६ लाखमा सीमित भएको छ ।
समीक्षा अवधिमा लघुवित्तले ८ अर्ब २० करोड निक्षेप संकलन र ७ अर्ब ९५ करोड सापटी लिई कुल १८ अर्ब ७३ करोड ऋण लगानी गरेको छ । हाल १ अर्ब १५ करोड रुपैयाँ चुक्ता पूँजी रहेको लघुवित्तको रिटेन्ड अर्निङमा १ अर्ब ६ करोड रुपैयाँ र जगेडा कोषमा ९६ करोड रुपैयाँ संचित छ ।
नाफा घटेसँगै लघुवित्तको प्रतिसेयर आम्दानीमा गिरावट आएको छ । समीक्षा अवधिमा लघुवित्तको प्रतिसेयर आम्दानी ५०.०४ रुपैयाँबाट घटेर ३४.२९ रुपैयाँमा झरेको छ ।
यस्तै, प्रतिसेयर नेटवर्थ २७५.२८२ रुपैयाँ, मूल्य आम्दानी अनुपात २६.३० गुणा र खराब कर्जा ५ गुणाले बढेर ३.६८ प्रतिशत पुगेको छ ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
