सर्लाही । सर्लाहीको लालबन्दी नगरपालिकामा कांग्रेसका उम्मेदवारले मेयरमा दर्ता गराएको मनोनयन फिर्ता लिने पत्र पार्टी सभापति शेरबहादुर देउवाले निर्वाचन अधिकृतलाई पठाएपछि लालबन्दीमा तनाव सृजना भएको छ ।
उम्मेदवारको अन्तिम नामावली प्रकाशित भइसकेपछि पार्टी सभापतिको पत्र आएकाले उम्मेदवारी फिर्ता नहुने भन्दै कांग्रेस कार्यकर्ताले लालबन्दीस्थित निर्वाचन अधिकृतको कार्यालय अघिल्तीर नाराबाजी गरेका छन् ।
देउवाले लालबन्दी नगरपालिकामा कांग्रेसको तर्फबाट मेयर पदका उम्मेदवार बासुदेव अधिकारीको उम्मेदवारी फिर्ता लिइएकाले उम्मेदवारको सूचीबाट हटाउन आग्रह गर्दै पत्र पठाएका थिए ।
उम्मेदवारी फिर्ता लिने समय ५ बजेपछि पार्टी सभापतिले पत्र पठाएकाले त्यो कानुनीरुपमा अमान्य भएकाे र त्यसलाई मान्यता नदिन माग गर्दै निर्वाचन अधिकृतको कार्यालय अगाडि कांग्रेस कार्यकर्ताले नाराबाजी गरेका हुन् ।
निर्वाचन अधिकृतको कार्यालयले साँझ ५ बजेपछि प्रकाशित गरेको नामावलीमा कांग्रेसको मेयरका उम्मेदवारमा कांग्रेसका उम्मेदवार बासुदेव अधिकारीको नाम पनि छ ।
लालबन्दीका कांग्रेस नेता एवं निर्वाचन क्षेत्र १ प्रदेश 'ख' का सभापति सिताराम दाहालले ताेकिएकाे समयभन्दा ढिलाे भएकाले उम्मेदवार फिर्ताका लागि केन्द्रले पठाएको पत्र निष्क्रिय भएको बताए । 'फिर्ता लिने समयभन्दा ढिलो पत्र आएकाले त्यो कार्यान्वयन भएन,' उनले भने, 'कांग्रेसको उम्मेदवार कायम रहेको प्रमाण निर्वाचन अधिकृतकाे कार्यालयबाट लिइसकेका छौं । केही बेरमा विज्ञप्ति निकालेर यसबारे पर्न गएको भ्रम निवारण गर्छाै ।'
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
