सुर्खेत । जिल्ला प्रहरी कार्यालय सुर्खेतले अवैध मालसमान ओसोरपसार कार्यमा संलग्नलाई कडाइ गरेको छ । प्रहरीले भन्सार छलेर अवैध तरिकाले विभिन्न जिल्लामा मालसमान भित्र्याउने कार्यमा संलग्नलाई धमाधम समात्न थालेको छ ।
प्रहरीले यो एक साताभित्र नेपालगञ्जदेखि छिन्चुतर्फ आउँदै गरेको कर्णाली प्रदेश ०२००१ ख ००१२ बसमा लोड गरेको एक लाख ६५ हजार ६५७ रुपैयाँको अवैध मालसमान, क, प्र, ००२ ख ०१०९ बसमा राजस्व छली गरी अवैधरूपमा ल्याइएको तीन लाख २४ हजार १० रुपैयाँ र चितवनबाट सुर्खेततर्फ आउँदै गरेको प्रदेश नं ३–०१०२३ च ७१४२ नम्बरको जीपमा राजस्व छली ल्याइएको दुई लाख ८५७ रुपैयाँ बराबरको अवैध मालसमान बरामद गरेको थियो ।
दाङदेखि जाजरकोटसम्म रा १ क ३७ नम्बरको मिनी ट्रकमा राजस्व छली अवैधरूपमा लैजाँदै गरेको रु तीन ९६ हजार, नेपालगञ्जदेखि सुर्खेतसम्म क.प्र. ०२००१ ख ०३५१ नम्बरको ट्रकमा ल्याउँदै गरेको रु पाँच लाख ६८ हजार ३९९ को अवैध सिमेन्ट सरिया, नेपालगञ्जदेखि भे १ ज ९४३ नम्बरको जीप र ना ८ ख १३७ नम्बरको फोर्स गाडीमा ल्याइएको सात लाख ६६ हजार ८० रुपैयाँ बराबरको अवैध मालसमान बराम गरिएको जिल्ला प्रहरी कार्यालय सुर्खेतका प्रहरी प्रमुख प्रहरी उपरीक्षक पदमबहादुर विष्टले जानकारी दिए ।
त्यस्तै काठमाडौंदेखि जुम्ला जाँदै गरेको ना ६ ख ६३३८ नम्बरको बसबाट ४० लाख २६ हजार रुपैयाँको अवैध मालसमान बरामद गरिएको प्रहरी उपरीक्षक विष्टले बताए ।
‘हामीले बुधबारसम्म अवैधरूपमा कर छली गरेर ओसारपसार गरिएको कुल जम्मा ६८ लाख ३४ हजार ४७९ रुपैयाँ बराबरको अवैध मालसमान बरामद गरेका छौँ’, उनले भने, ‘त्यसमा संलग्न आठ सवारी चालकलाई पक्राउ गरी अनुसन्धान कार्य थालिएको छ ।’ राज्यलाई कर छली गरी अवैध मालसमान ओसारपसार गर्नेलाई उच्च निगरानी राख्ने काम गरिएको उनले बताए ।
यता जिल्ला प्रहरी कार्यालय सुर्खेतका सूचना अधिकारी एवं प्रहरी नायब उपरीक्षक रामप्रसाद घर्तीले अदालतको फैसला कार्यान्वयन अभियान अनुसार गएको सातासम्म २२ फरार प्रतिवादी पक्राउ गरेको बताए ।
उनका अनुसार पक्राउ पर्नेमा पाँच महिला र १७ पुरुष छन् । उनीहरूलाई २२ वर्ष आठ महिना २८ दिन कैद र ५९ हजार १०० रुपैयाँ जरिवाना तोकिएको छ । त्यस्तै लागुऔषध ब्राउन सुगरसहित १३ जनालाई पक्राउ र ६७ ग्राम ५१० मिलिग्राम लागुऔषध प्रहरीले बरामद गरेको छ ।
‘यो साताभित्र २९७ भााडाबर्तनसहित ९ हजार १६२ लिटर तयारी तथा १६ हजार १८ कच्चा अवैध घरेलु मदिरा बरामद गरी नष्ट गरिएको छ,’ उनले भने, ‘दुई सय २० ग्राम गाँजा पनि बरामद गरिएको छ ।’
त्यस्तै सुर्खेत प्रहरीले जुवाखालबाट दुई लाख १४ हजार ९७० रुपैयाँ बरामद गर्नुका साथै एक महिलासहित आठ जुवाडेलाई पक्राउ गरेको छ । एक लाख २३ हजार रुपैयाँको ६१।५ क्युफिट साल सिसौको काठसहित दुई जनालाई पक्राउ गरी आवश्यक कारवाहीका लागि जिल्ला वन कार्यालय सुर्खेतमा पठाइएको प्रहरीले जनाएको छ । रासस
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
