काठमाडौं । लकडाउन खुकुलो भएसँगै कोरोनाभाइरसको संक्रमणको ग्राफ समेत बढेको छ। पर्सा लगायतका जिल्लामा संक्रमण समुदायस्तरमा फैलिएको छ। काठमाठौं उपत्यकामा समेत संक्रमितको संख्या थपिँदै गएको छ।
तर, अहिलेसम्मको तथ्यांक हेर्दा कोरोना संक्रमणबाट सबैभन्दा धेरै प्रदेश २ का जिल्ला प्रभावित बनेका छन्। स्वास्थ्य तथा जनसंख्या मन्त्रालयको बुधबार बेलुकासम्मको तथ्यांकअनुसार सबैभन्दा धेरै संक्रमित भएका पाँच जिल्लाको सूचीमा प्रदेश २ का तीन जिल्ला छन्।
नेपालमा सबैभन्दा धेरै कोरोना संक्रमित भएको जिल्ला रौतहट हो। मन्त्रालयको तथ्यांकअनुसार रौतहटमा अहिलेसम्म एक हजार ६१७ जनामा कोरोना संक्रमण पुष्टि भएको छ। जसमध्ये ७९५ जना निको भएका छन्। रौतहटमा २ जनाको मृत्यु हुँदा ८२० जना सक्रिय संक्रमित रहेका छन्।
सबैभन्दा धेरै संक्रमण पुष्टि भएको जिल्लाको दोस्रो नम्बरमा कैलाली छ। कैलालीमा हालसम्म एक हजार २८१ मा कोरोना संक्रमण पुष्टि भएको छ। संक्रमितमध्ये एक हजार १०३ जना निको भइसकेका छन् भने ४ जनाको मृत्यु भएको छ। कैलालीमा अहिले १७४ जना सक्रिय संक्रमित छन्।
यो सूचीको तेस्रो नम्बरमा पर्सा छ। पर्सामा अहिलेसम्म एक हजार २२२ जना कोरोना संक्रमित भेटिएका छन्। जसमध्ये २४७ जना निको भएका छन् भने १९ जनाको मृत्यु भइसकेको छ। पर्सामा अहिले सक्रिय संक्रमितको संख्या ९५६ छ।
चौथो नम्बरमा रहेको काठमाडौंमा एक हजार १६६ जना संक्रमित भेटिएका छन्। जसमध्ये ११८ जना निको भएका छन्। ८ जनाको मृत्यु भइसकेको छ, भने एक हजार ४० जना सक्रिय संक्रमित छन्। काठमाडौं देशभरका सबैभन्दा धेरै सक्रिय संक्रमित रहेको जिल्ला हो।
सूचीको पाँचौ नम्बरमा रहेको महोत्तरीमा ९९९ जना कोरोना संक्रमित भेटिएका छन्। जसमध्ये तीन सय ६४ जना निको भएका छन्। सक्रिय सक्रमितको संख्या ६३५ छ।
नेपालका सात प्रदेश मध्ये सबै भन्दा बढी कोरोना संक्रमित प्रदेश २ मा रहेका छन्। बुधबारसम्ममा प्रदेश २ मा ६ हजार ९१३ जनामा कोरोना संक्रमण पुष्टि भइसकेको स्वास्थ्य तथा जनसंख्या मन्त्रालयले जनाएको छ।
जसमध्ये ३९ जनाको मृत्यु भइसकेको छ, भने तीन हजार ४१७ जना निको भएका छन्। अहिले प्रदेश २ मा सक्रिय संक्रमितहरुको संख्या तीन हजार ४५७ रहेको छ।
सबै भन्दा कम संक्रमित गण्डकी प्रदेशमा रहेका छन्। गण्डकीमा जम्मा एक हजार ७४० संक्रमित छन्। हालसम्म निको हुनेको संख्या एक हजार ४८७ छ भने ६ जनाको मृत्यु भइसकेको छ। गण्डकी प्रदेशमा सक्रिय संक्रमितको संख्या २४७ रहेको छ।
सबैभन्दा धेरै मृत्यु हुने जिल्ला पर्सा
कोरोनाका संक्रमणबाट सबैभन्दा धेरै मृत्यु पर्सामा भएको छ। बुधबारसम्म पर्सामा १९ जनाको मृत्यु भइसकेको छ। यस्तै काठमाडौंमा आठ जनाको मृत्यु हँदा मोरङमा ६ जनाले ज्यान गुमाएका छन्। कैलाली र बारामा चार–चार जनाको मृत्यु भएको छ। गुल्मी, सप्तरी, सिन्धुपाल्चोक र बाँकेमा तीन–तीनजनाको मृत्यु भएको छ। हालसम्म ४३ वटा जिल्लाहरुमा कोरोनाका कारण मृत्यु हुनेको संख्या शुन्य छ।
यी हुन् सबैभन्दा धेरै डिस्चार्ज हुने नौ जिल्ला
सबै भन्दा धेरै डिस्चार्ज हुने जिल्ला हो, कैलाली। हालसम्म कैलालीमा एक हजार १०३ जना डिस्चार्ज भएका छन्। दैलेखमा ९२३ जनाले कोरोना जित्दा रौतहटमा ७९५ जना निको भएर घर फर्किएका छन्। सर्लाहीमा ६५६, दाङमा ६५३, धुनुषामा ६११, सुर्खेतमा ५८३ जना डिस्चार्ज भएका छन्। यस्तै पाल्पामा ५५९ र डोटीमा ५७३ निको भएका छन्।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
