काठमाडौं । कोरोना महामारीका बीच पनि विप्रेषण (रेमिट्यान्स) आप्रवाह उल्लेख्य रुपमा बढेको छ ।
नेपाल राष्ट्र बैंकले सार्वजनिक गरेको चालू आर्थिक वर्षको पहिलो चार महिनाको मुलुकको आर्थिक तथा वित्तीय अवस्थाको प्रतिवेदन अनुसार रेमिट्यान्स आप्रवाह ११.२ प्रतिशतले बढेको छ ।
चालू आर्थिक वर्षको कात्तिकसम्ममा ३ खर्ब ३७ अर्ब ७२ करोड रुपैयाँ रेमिट्यान्स भित्रिएको नेपाल राष्ट्र बैंकले जनाएको छ ।
अमेरिकी डलरमा विप्रेषण आप्रवाह ६.४ प्रतिशतले वृद्धि भई २ अर्ब ८५ करोड पुगेको पुगेको छ ।अघिल्लो वर्ष यस्तो आप्रवाह १.६ प्रतिशतले घटेकोे थियो ।
कोरोना महामारीका बीच रेमिट्यान्समा वृद्धि हुनु अर्थतन्त्रका लागि सकारात्मक रहेको अर्थविदहरु बताउँछन् ।विश्वभर कोरोना प्रभाव परे पनि नेपाली कामदार रहेका देशहरुले ठूलो मात्रमा कामदार कटौती नगर्दा रेमिट्यान्स नघटेको उनीहरुको भनाइ छ । यस्तै, हुन्डीमार्फत हुने कारोबार घटेसँगै रेमिट्यान्समा वृद्धि भएको हो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७५.८ प्रतिशतले घटेको छ ।अघिल्लो वर्षको सोही अवधिमा यस्तो संख्या ५.६ प्रतिशतले बढेको थियो ।कात्तिकसम्ममा १९ हजार २५१ जनाले अन्तिम श्रम स्वीकृति लिएका छन् ।
यस्तै वैदेशिक रोजगारीका लागि पुनः श्रम स्वीकृति लिने नेपालीको सङ्ख्या ६७.९ प्रतिशतले घटेको छ । समीक्षा अवधिमा २५ हजार ९३१ जनाले पुनः श्रम स्वीकृति लिएका छन् । गत आवको पहिलो चार महिनामा पुनः श्रम स्वीकृति लिनेको सङ्ख्या ९.१ प्रतिशतले बढेको थियो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
