हराएको वा बिग्रिएको सिमका लागि अब अनलाइनबाटै आवेदन दिन सकिने

काठमाडौँ । नेपाल टेलिकमले हराएको वा बिग्रिएको सिमकार्ड प्रतिस्थापन प्रक्रियालाई थप सहज बनाएको छ। अब सेवाग्राहीले अनलाइनमार्फत आवश्यक विवरण भरेर नयाँ फिजिकल सिम वा ई–सिमका लागि आवेदन दिन सक्ने भएका छन्।

कम्पनीले यो सेवा आजै साउन १ गते देखि औपचारिक रूपमा सञ्चालनमा ल्याएको हो। नेपाल टेलिकमका अनुसार हराएको वा बिग्रिएको सिमको सट्टा नयाँ सिम लिन चाहने सेवाग्राहीले esim.ntc.net.np पोर्टलमा प्रवेश गरी ‘लस्ट/ड्यामेज्ड सिम’ सम्बन्धी आवेदनमा क्लिक गर्नुपर्नेछ। त्यसपछि दिइएको निर्देशनअनुसार दर्ता प्रक्रिया पूरा गरी आवश्यक विवरण पेश गर्नुपर्ने व्यवस्था गरिएको छ।

अनलाइन आवेदन पूरा भएपछि ग्राहक स्वयं टेलिकमको सेवा केन्द्रमा उपस्थित भएर वा आफ्नो प्रतिनिधिमार्फत नयाँ सिमकार्ड प्राप्त गर्न सक्नेछन्। सिम प्रतिस्थापनका लागि लाग्ने ५० रुपैयाँ शुल्क भने सेवा केन्द्रमै तिर्नुपर्नेछ।

यदि ग्राहक आफैं उपस्थित हुन नसकेमा प्रतिनिधिमार्फत सिम लिन सकिने व्यवस्था पनि गरिएको छ। त्यसका लागि आवेदन फाराममै प्रतिनिधिको नाम उल्लेख गर्नुपर्नेछ भने प्रतिनिधिले आफ्नो परिचय खुल्ने आधिकारिक कागजात पनि पेश गर्नुपर्ने नेपाल टेलिकमले जनाएको छ। कम्पनीका अनुसार ग्राहकको गोपनीयता र सुरक्षालाई सुनिश्चित गर्न यस्तो व्यवस्था गरिएको हो।

नेपाल टेलिकमले सञ्चालनमा ल्याएको यही पोर्टलमार्फत हराएको वा बिग्रिएको सिम प्रतिस्थापन सेवासँगै नयाँ प्रिपेड ई–सिम लिन, फिजिकल सिमलाई ई–सिममा रूपान्तरण गर्न, नयाँ फिजिकल सिम प्राप्त गर्न तथा ग्राहकको केवाईसी विवरण अद्यावधिक गर्ने सुविधा पनि उपलब्ध रहेको जनाएको छ।